Vawiin khan  Agriculture Minister  Pu R. Lalzirliana chuan New Secretariat Complex, Khatlaah Agriculture Department hnuaia Custom Hiring Centre thara hman tur Tractor 12 a vai liam. Minister hi Youth Commission Chairman Pu T.Sangkunga’n a tawiawm a ni.

Pu R.Lalzirliana chuan loneitute hman tur tractor rual an pe chhuak leh ta chuan Mizoram sorkar kal tum dan leh kal mek dan a tilang chiang hle, a ti. Sorkar chuan loneituten awlsam leh hlawk zawka hna an thawh theihna turin hma a la zel a, kum 2009 atang khan subsidy in power tiller 913, mini power tiller 360 leh tractor 62 an pe chhuak tawh a, kumin chhung hian power tiller 410 leh mini power tiller 285 pekchhuah tur chu sem chhuah tan mek a ni, a ti a. Mimalah ni lovin custom hiring centre-ah loneitu intelkhawm (society) te hnenah sorkarin man tlawm te in Tractor leh a hmanraw dangte a pe a, anmahnia inrelbawl turin a ruahman a. Heng custom hiring centre te hi tun dinhmunah 7- Phaizau, Middle Phaisen, Kaihzawl, Zawlpui, Lumtui, Phaidung-I leh Ngengrual-ah te a awm mek a, 40  neih belh tum niin heng zinga Centre 28 chu peihfel a ni tawh, Agriculture Minister chuan a ti.

Dr. C. Lalzarliana, Director of Agriculture (Crop Husbandry) chuan Technical Report pein Custom Hiring Centre hi Centrally Sponsored Scheme, RKVY (Infrastructure & Assets) 2014-15 leh Sub-Mission on Agricultural Mechanization (SMAM) 2014-15 atanga hmalakna a nih thu a sawi a.  RKVY hnuaiah Centre 36 leh SMAM hnuaiah Centre 4 a awm a, RKVY-ah hian pawisa Sanction zat cheng nuai 342 leh SMAM  hnuaiah cheng nuai 38 a nih thu tarlangin Director chuan Project/Centre pakhat atan cheng nuai 10 theuh ruahman a ni, a ti.

RKVY hnuaiah Custom Hiring Centre, Aizawl District-ah 3, Lunglei District-ah 4, Saiha District-ah 2, Champhai District-ah 4, Kolasib District-ah 4, Serchhip District-ah 2 leh Mamit District-ah 2 dah tura ruahman a ni a. SMAM hnuaiah chuan Aizawl, Champhai, Kolasib leh Serchhip District-ah 1 theuh dah tura ruahman a ni bawk. Custom Hiring Centre-a an pekte hi Tractor 12 bakah Trailer, Rotavator leh buhhmun thlawhna khawl Paddy Weeder te a ni.

Pu Lalrammawia, Joint Secretary, Agriculture kaihhruai programme tawi buatsaihah hian Agriculture Officer leh Staff bakah loneitu engmaw zat an tel bawk.