Mizoram Cooperative Fish Farming Marketing and Processing Federation Ltd. (ZOFISFED) chuan vawiin khan 13th Annual General Assembly, I&PR Auditorium ah an hmang a, Fisheries Minister Dr B.D.Chakma-in a hmanpui.

Khuallian Dr B.D.Chakma chuan Fisheries Department-in nasa taka hma a sawnna te chu a enkawltu Minister hmasa te leh Department hotute thawh rah a ni, a ti a. Sangha chu mihring hriselna atana tha, hnam leh sakhaw tinreng ei theih a nih avangin uar zawka sangha khawi kan intihhmuh zel a pawimawh a ni, a ti bawk. Sangha khawi chawikanna leh hmasawnna tura ZOFISFED hmalakna hrang hrang te avangin lawmthu a sawi a, hmasawnna hna thawk turin Sawrkar leh Department hminga tih theih loh, society leh federation kaltlang chauhva tih theih tam tak a awm thu a tarlang bawk. Sangha chi lei dawna a chhangtu rate hniam ber thlan a ni thin chuan quality-in a tuar phah thin a, kan tlin tawk hre reng chunga marketable rate kan zawn thiam a pawimawh a ni, a ti bawk. Lui hnar, sangha leh nungcha te humhalh nana YMA hmalakna te chu fakawm a tih thu sawiin kan chenna boruak thianghlim vawng tlat tura kan zavaia kan tan tlan a ngai a ni a ti. Ram puma sum harsatna a thlen mek laia, hmasawnna tura sawrkarin project hrang  hrang a thawhna ah compensation ah sum tam tak hman a tul thin chuan hmasawnna a tihthuanawp thu sawiin Dr B.D.Chakma chuan ram tana inpekna thinlung pu turin mipui a sawm bawk a ni.

ZOFISFED Managing Director Dr O.P.Singh chuan ZOFISFED kalphung leh an hmalakna report a pe a. 1998-a din ZOFISFED ah tunah hian Mizoram pumah Primary Fishery Cooperative Society 24 an tel mek a, ZOFISFED-in a enkawl mek sangha dil 7 tihchangtlunna turin Department of AH, Dairying and Fisheries, Government of India chuan kum kalta khan Rs 203.73 lakhs a rawn sanction a, heta First Instalment Rs 50 lakhs dawn tawh chu Zawlnuam, Darlak, Saikhawthlir, Thenzawl leh Chemphai Fish Seed Farm, Bilkhawthlir ah sangha khawina dil siam nan hman a ni. Fisheries Post Harvest Infrastructure Scheme hnuaiah Central Sawrkar chuan Rs 93,49,000 /- a rawn pek tawh atangin ZOFISFED enkawlna hnuaiah Mizorama Cooperative Societies member te tihhmasawn nan hman a ni a, he sum hmang hian Buhchangphai, Darlak leh Zawlnuam ah Mini Ice Plant sak a ni a, sangha zawrh nan Refrigerated Truck 2 leh Insulated Truck 1 lei a ni a, Ice Box nena thuam Three wheeler 2 leh Two wheeler 2 lei a ni bawk. Champhai, Aizawl, Mamit leh Zawlnuam ah Kiosk 4 siam a ni bawk. He Scheme hnuaia Central Sawrkarin Rs 100 lakhs a rawn sanction leh hmangin Ice Plant, trucks, auto rickshaw, motor cycle leh kiosk lei turin hmalak mek a ni bawk. Sangha khawitu ten an hralh tur phurh nan Mobile Fish Marketing Scheme hnuaiah NFDB chuan Subsidy a rawn pe a, Primary Fisheries Cooperative Societies 14-a beneficiary te hnenah Two wheeler 70 sem a ni tawh bawk a ni.

Vawiin ZOFISFED Annual General Assembly hian thupui ah ‘In intodelh nan - Cooperative Society kaltlangin Sangha khawi rawh’ tih an hmang a, Chairman Pu F.Lalnienga’n kaihruaiin, Mizoram hmun hrang hrang atangin Fishery Cooperative Society member te an rawn tel a, Pi Lalfakzuali, Addl. Registrar, Cooperative Societies, Pi Lalmuanpuii, Chairman, Mizoram Cooperative Apex Bank Ltd., Pu Laldawngliana, Chairman MIZOFED leh Pu F.Zosanga, Chairman, PIGFED ten an hmanpui bawk a ni.