2483/2023-2024
Aizawl, the 25th October 2023: ICT Department chuan Cyber Security Awareness Month’ kalpui mek denchhenin Cyber Security chungchangah Mipuite tana hriattur pawimawh leh zirtirna atan thuchhuah a hnuaia tarlan ang hian a siam.
Cyber Security chungchang inzirtirna (Cyber Jagrookta Diwas) hi kum 2022 atang khan India ramah mumal taka neih tan a ni a, hemi pual hian October thla hi ‘Cyber Security Awareness Month’ a hman thin a ni.
Keini Mizo te hian technology hmasawnna hi nasa taka kan chhim ve theih tak avangin cyber security chungchang zirtirna kan mamawh hle. Hum sual kan dai palh loh nan heng a hnuaia mi te hi hre tlang ila, a hre lo te hriattirtu ni zel ila a lawmawm hle ang:
Kum tling lo ten Social Media an hman nasat tawh avangin fimkhur pui an ngai em em a. Anmahni enkawltuten an thiltih thin hriatpui a pawimawh. Sum leh pai kaihhnawihah miin an bum loh nan te, midangte tana harsatna thlentu an nih loh nan te, chutiang avanga harsatna tawk tu an nih loh nan te Social Media an hman dan hriatpui hi a pawimawh a ni.
Online khawvelah hian sum leh pai kaihhnawiha midangte bum tum an thahnem tawh hle a, mitin kan fimkhur a pawimawh a ni. Hriat chian loh hnena pawisa thawn ngawt te, tlawm uchuak khawpa thil zawrh te hi rinhlelh nachang hriat a tha a, Online shop-ah pawh Cash on Delivery tih theih leh Return phal ngei te chauh dawr thin tur a ni.
Sum leh pai duham lutuk avang hian khaw hmu lo lekin a awm theih a, fimkhur a har thin. Chuvangin, sum leh pai lakluh chungchangah rilru thianghlim tak puin social media hi hman tur a ni.
Mipat hmeichhiatna kaihhnawih thilah danin a phal loh thil tih loh tur a ni a, midangte tih tir torah tan loh bawk tur a ni. Mihring hlutna leh zahawmna hi hun reilo te chhungin mipat hmeichhiatna kaihhnawihah a hloh theih a, insum theihna hian zahawmna a keng tih hriat nawn fo a tha.
Thu thar thehdarh hmasatu nih chak lutuk avang hian thu dik tawk lo thehdarh palh theih a ni. Chuvangin, thu kan thehdarh turte chu a dik leh dik loh finfiah hmasak zel a tha.
Cyber Crime kaihhnawih dan - IT Act (2000) Section 43, 66 leh 67 te bakah IPC (1980) Section 464, 468, 469 leh a dang te sawrkarin khawng takin a kengkawh a ni.
Cyber crime leh a kaihhnawiha harsatna nei ten kan harsatna tawhte zep mai lovin, aia thiam zawkte rawn tur a ni a. A tul a nih chuan Police Station hnai berah kal thuai tur a ni.
