2415/2022-2023
Khawzawl, the 24th October, 2022: Regional Meteorological Centre, New Delhi leh State Meteorological Centre, Govt. of Mizoram-in a tihchhuah angin Bay of Bengal chhim chhak lama Cyclone insiam mek chuan Mizoram chu October ni 25, 2022-ah thli hrut ve thut theihah dah a ni a, October ni 25, 2022 hian darkar khata kilometer 45-65 vela nain thli hi thawk tura ngaih a ni. He cyclone avang hian Mizoram hmun hrang hrangah October ni 24 (Thawhtanni), October ni 25 (Thawhlehni) leh October ni 26 (Nilaini), 2022 ahte hian ruah tam tak sur thei a ni bawk a ni.
Khawzawl District Bawrhsap Pu C.C. Lalchhuangkima, Chairman, District Disaster Management Authority (DDMA) ni bawk chuan Cyclone chungchangah District mipuite chiai lo turin a chah a. District mipuite chu cyclone thleng thut palh thei leh chhiatna thleng theite laka fimkhur tur leh inkaihhruaina a hnuaia tarlante hi tha taka zawm turin a hriattir a ni:
1. Mahni in leh lo te'n thli leh ruah a dawl theih nan a tul anga thawm that ngai laite thawm that tur a ni. Tui paihna leh tuihawk luan kawrte mumal taka siam/thenfai tur a ni.
2. Mahni in leh a velah leimin hlauhawm a awm anih chuan silpaulin/ tarpaulin a khuh that tur a ni.
3. Thing leh mau, thli in a len tluk mai theih, electric wire delh mai theihte chu kih/a zar thlak tur a ni.
4. Thlipui leh ruah avanga eng (current) neih loh theih anih avangin electric hmang thilte in 'charge' lawkin, eng awm loh palha eng chhit tur inruahman lawk tur a ni.
5. Khualzinte tan kawng laka chhiatna thleng thei palhah, tui thianghlim leh eitur inruahman lawk theih a tha.
6. Lui leh tui hmunahte kal loh a tha.
7. Thu dik tawk lo leh belhchian dawl lo thehdarh loh tur a ni a, thehdarh an awm chuan DM Act-2005 hnuaia hremna dan ziak angin an chungah action lak a ni ang.
Khuarel chhiatna a lo thlenin District Emergency Operation Centre, toll free number - 1077 hi engtik lai pawha biakpawh theih a ni a, eng emaw avanga line tlang thei lo anih pawhin Pu Obed Lalmalsawma, SDC/ DM&R Nodal Officer (contact no. 9612345829) hnenah chhiatna thlen thu hriattir thuai tur a ni.
