Vawiin chawhma khan Governor P.S. Sreedharan Pillai chuan Conference Hall, Raj Bhavan -ah Office Bearers, Central Young Mizo Association(CYMA) te a kawm.

CYMA hotute a kawmnaah Governor P.S. Sreedharan Pillai chuan YMA chu India rama tlawmngai pawl chak leh thawh hlawk ber zinga mi tia a lo hriat tawh thin thu a sawi a. Khawtlang rawngbawlna kawngah an thawhhrimna avanga an hlawhtlinna tam takte avangin YMA chu thinlung takin a lawmpuina a ni a ti. Governor hian CYMA hruaitute chu YMA hmachhawp mek, an hnathawh lai leh an ngaih pawimawh zual deuh te a zawt a. CYMA hruaitute chuan Mizo khawtlang nuna YMA hnathawh leh rawngbawlna te sawi hmasa in Mizo Hnam thil leh Hnam ziarang humhalha tul thu te leh ruihlo do kawnga an tih theih chin baka phungbawmna an mamawh chungchang te chipchiar takin Governor hi an hrilh a ni.

CYMA hotute chuan Bangladesh atanga danloa rawn lut tam tak, Chakma Autonomous District Council huamchhungah an inbeng bel mek zel chu tha lo an tih thu sawiin ramri venhimna atan CRPF, Mizo hlang awmna Union Home Minister in a lo tiam tawh chu tihlawhtlin thuai a ngai an ti a. 8th Schedule of Constitution of India-ah Mizo Tawng telh a nih loh avanga Mizo thalai ten harsatna an tawh chungchangte an sawi a. Mizo Tawng pawh 8th Schedule hnuaiah Official Language pakhat anga dah luh a nih ve theihna turin Governor chu hma la turin an ngen bawk a ni. CYMA hotute chuan Mizoram, India leh Myanmar inramrina hrul chu Free Border regime huam chhung a nih avangin awlsam taka in kalpawh theih a nih thu te; hei vang hian henglai hmunah hian ruihlo tawlhluh a hluar hle a, a tuar tute chu Mizo thalaite an ni an ti a. Ruihlo do kawngah chak zawka sawrkar nen an thawh dun zel theihna tura tanpui turin Governor hi an sawm bawk a ni. Tin, AIDS/HIV pung chak chungchang pawh an vei thu sawiin Governor chu theihtawp chhuah turin an ngen nghal a. Governor P.S. Sreedharan Pillai chuan CYMA hotute chu an thil ngaih pawimawh deuh te chu a hnenah ziaka thlen turin a ngen a. Sawrkar hotulu ber a nih angin a tihtur te chu zirchianna nei hmasain a tih zel dawn bakah sawrkar aiawhin central Sawrkarah pawh state mamawhte a thlen chhunzawm zel tur thu a sawi a. CYMA hotute chu mipui rawngbawltu an nih angin mipui leh khawtlang mamawh mamawh chungchangah pawh finchhuah thin tur leh thurawn pe thin turin a sawm nghal a ni.

Governor leh CYMA OB te inkawmnaah hian Pu Vanlalruata, President, Tv Lalhmachhuana,Vice President, Prof.Lalnuntluanga, General Secretary, Pu Fabian Lalfakawma, Tresurer, Dr. Malsawmliana, Asst. Secretary leh Pu Roneithanga, Finance Secretary te an tel a ni.