Ministry of Tribal Affairs hnuaia Tribal Cooperative Marketing Development Federation of India (TRIFED) leh Cooperative Department te chuan Mizorama TRIFED enkawl scheme Van Dhan Scheme kalpui anih ve theihna turin vawiin khan Agriculture Minister Office a Agriculture Minister Pu C. Lalrinsanga hriatpuina in thawhhona thuthlung (MoU) an ziak fel a. TRIFED aiawhin Pu A. D. Mishra, Regional Manager (Guwahati) TRIFED leh Cooperative Department, Mizoram Sawrkar aiawhin Pu J.P. Agarwal, Secretary, Cooperation Department ten he thawhhona thutlungah hian hming an ziak a ni.

Agriculture Minister, Cooperative Department changtu ni bawk Pu C. Lalrinsanga chuan thawhhona thuthlung ziahfel ani chu thil chhinchhiah tlak tak a ni tiin he thawhhona hi a taka kan tihhlawhtlin theih hunah chuan a hlawkna tel tur leh a tangkaipui ber tur chu thingtlang lama kut hnathawktute an ni dawn a ni a ti a. Tunlai khawvelah thil in ang deuh leh thil tum in ang te chu chhunfin a, project mal khalh anga kalpui Convergence anga kalpui hi a tha in, a hlawkna tel tur te pawhin an hlawkpui ber thei a ni tiin Convergence hi Sawrkar pawhin a ngaihpawimawh thu a sawi. He thawhhona thuthlung hian Mizoram economy tan hmasawnna a thlen ngei a beisei tih a sawi bawk a ni.

MoU ziahnaah hian Forest, Environment and Climate Change Department aiawhin Pu Liandawla leh Cooperative Department aiawhin Registrar of Cooperative Societies Pu Naveen Agarwal ten thu an sawi bakah Pu A D Mishra, Regional Manager TRIFED pawhin thu an sawi a ni.

India rama tribal te hian Minor Forest Produce (MFP) hi an ei leh bar, an khawsakna leh inrelbawlna, an damdawi leh an ei zawnna atan te a an hman ber leh an nunah ran ngaw leh a chhunga thil awm te a bet tlat tih hriain Sawrkar Laipui chuan Pradhan Mantri Van Dhan Yojana hi April 2018 atangin bul a tan a. Van Dhan Scheme hi hemi scheme lian hnuaia Scheme pakhat niin an hnathawh kawnga kuthnathawk tute thiamna tihpun skill upgradation te, kawng hrang hranga an intuaihriamna zirtir capacity building te, an tharchhuah tha taka sawngbawl, primary processing te leh an tharchhuah man man zawka an hralh thei nan a hlutna tihpun value addition te a ni.

Van Dhan Scheme hnuaiah hian Self Help Group te chu Primary Level an ni anga an chung chiahah hian Village Level-ah Kendra (Van Dhan Kendra) a awm leh ang. Mizoram-ah chuan Van Dhan Kendra atan Primary Cooperative Societies te an ni ang, Kendra pakhatah hian Self Help Group (SHG) 15 awm tura beisei an ni. Mizoram pumah Van Dhan Scheme kalpui thei tur Van Dhan Kendra 43 ruahman chin a ni.

Thawhkhatna atana Scheme in a ruahman angin Primary Level ah SHG pakhat zelin cheng nuai 1 leh an hnathawhna tur sum che vel tur working capital cheng 50,000 an dawng dawn a. Thawhhnihnaah Van Dhan Kendra (Primary Cooperative Societies) zinga ti tha zual leh hlawhtling te thlanchhuah an ni ang a, chungte chu Pucca Kendra a hlan chhoh chauh tur an ni dawn a. Pucca Kendra te tih changtlun nan cheng nuai 20 theuh pek an ni dawn bawk a ni.