Vawiin khan I&PR Auditorium ah PHE Department leh Central YMA chuan Tuihna Humhalh tura kum 3 chhung an thawhhona hrang hrang te zirchianna hun an hmang. He hunah hian Pu Hmingdailova Khiangte, Parliamentary Secretary, PHED,UD&PA etc., chu khuallian ah hman a ni.

Parliamentary Secretary Pu Hmingdailova Khiangte chuan PHE Department leh CYMA thawhhona tha a tih zia sawiin hmasawnna tam tak hmuh tur a awm thu leh Mizoram chhunga tuihna tam zawk a lo put chhuah bel zel an hmalakna kal mek chu chak zawka thawk sauh sauh turin a chah a. He thawhhona hi a hlawhtlin chuan Mizoram chhunga khua zawng zawngin tui thianghlim intur hniarhnang taka an neih leh theih a beiseiawm thu a tarlang bawk a ni.

Workshop neih hun chhung hian PHED leh CYMA thawhhona in hma a sawn dan report te ngaihthlak a ni a. Kum 3 chhunga tuihna tipung tura YMA Group 4: Saitual,Darlawn,Khawzawl,Tuichangral ‘S’ leh YMA Branch 6: Sesih,Zotlang, Champhai,Leng, Vaphai,Samthang,Kanghmun hmalakna te ngaihthlak leh niin sawihona hun in a chhunzawm a ni. CYMA report in a tarlan dan chuan PHED leh CYMA thawhhona hian CYMA sub-headquarters zawng zawng a tuam chhuak vek tawh a ni.

Workshop hawnna inkhawm hi Er. Lalmuanzova, Chief Engineer, PHED in kaihruaiin Er. R. Lalfanliana, E-in-C, PHED,Er. C. Lalremsiama, Chief Engineer, PHED leh Central YMA President Pu Lalbiakzuala ten thu an sawi a. PHED leh CYMA thawhhona report leh hmachhawp te Er. C. Lalremsiama, Chief Engineer, PHED in a pe thung a ni.