Sports Minister Pu Zodintluanga’n vawiin chawhma khan Rajiv Gandhi Stadium-ah tukin zing a neih Mizoram Marathon Race 2014 a tithate hnenah Lawmman Semna programme buatsaih chu hmanpuiin, a tlan chak ber pathum hnenah lawmman a hlan a ni.
Pu Zodintluanga chuan intlansiak thui chi Marathon Race hi Mizoram Sawrkar anga buatsaih vawikhatna a nih thusawiin Sports discipline hrang hranga kumtin intihsiakna ang chi programme mumal tak kan nei thin a, marathon race hi kumtin nei turin ruahmanna kan siam dawn a ni, a ti a. Mizoram khaw hrang hrang atanga infiammi lokal he Marathon Race a tel te inpekna, tumruhna leh tuarchhelna chu fakin midangte, a bik takin khawpuia cheng thalai tam tak tan chona lian tak an siamsak a ni, a ti bawk.
Marathon Race 2014 hi tukin zing dar 6:00 khan Pu Zothankhuma, IAS, Secretary, Sports & Youth Services Department in Treasury Square atangin a vailiam a, Mizoram hmun hrang hrang leh Aizawl atangin mi 93 an tel a. World Bank Road, Khumtung Peng thleng va tlan thlengin, Aizawl panin an rawn kir leh a, Rajiv Gandhi Stadium rawn lutin, Marathon race hi an zo a ni, an tlan thui zawng hi km 42.195 a ni a. Marathon Race hi Sports & Youth Services Department leh Mizoram State Sports Council te tangkawpin an buatsaih a ni.
Marathon Race 2014 Prize Distribution Programme hi Pu Zothankhuma IAS, Secretary, Sports & Youth Services Department chuan kaihruaiin Pu J.Vansangzuala, Joint Director Sports & Youth Services Department hnen atangin Technical Report ngaihthlak a ni a, Pu Lalzirliana Chhangte, Director, Sports & Youth Services Department chuan lawmthu sawiin hun a khar a ni. He hunah hian Mizoram State Sports Council leh Sports & Youth Services Department senior officer leh thawktu dang thahnem tak an tel.
He programme zawh hian Sports Minister Pu Zodintluanga leh Sports & Youth Services leh Mizoram State Sports Council hotulu leh officer te hian Rajiv Gandhi Stadium leh Stadium chhaka Multipurpose Hall sak mek hnathawh enin ang fang kual bawk a ni.
Marathon Race 2014 a pakhatna chu T. Malsawmkima, Thingsen, Saiha niin darkar 3, minute 10 leh second 23 ah a tlan thleng a, pahnihna chu P.C. Lalnuzira, Ramthar Lunglei niin darkar 3, minute 12 leh second 36 ah a tlan thleng a, pathumna chu Lalrinnunga, North Chaltlang niin darkar 3, minute 23 leh second 12 ah a tlan thleng a ni. Pakhatna hian sumfai Rs. 30,000/- ; pahnihna in sumfai Rs. 20,000 leh pathumna in sumfai Rs. 10,000 an dawng a, heng lawmman hi Sports Minister in a hlan a ni.
Palina atanga sawmhnihna te hi Consolation Prize Rs. 500 theuh pek an ni.
Mizoram pum huapa neih Marathon Race 2014 atana inbuatsaihna chi khat atan Mizoram khaw hrang hrang hmun 10 – Lunglei, Saiha, Sangau, East Lungdar, Ratu, Kawrthah, Bukpui, Kolasib, Aibawk leh Champhai ah te Marathon race hi buatsaih a ni tawh a. Heng khaw 10 atanga timing neih tha zual infiammi 30 te chu vawiina Marathon Race ah hian an tlan a, anni bakah hian Aizawl leh hmun danga atanga infiammite an tel bawk a ni.
