Vawiin khan Law Minister Pu Lalsawta chuan Mizoram Kohhran Hruaitu Committee leh Mizoram Journalists’ Association hruaitute lengah sawmin tunhnaia Mizoram Assembly-in Dan thar a passed tak The Mizo Marriage Divorce and Inheritance of Property Act, 2014 chungchang a sawipui.
Pu Lalsawta chuan he Dan hman a nih hunah chuan kohhran hrang hrang ten Inneih Certificate an hman chu tlem a siam danglam hret a ngai dawn a. Kohhran Dan a inneihna tidanglam si lovin Inneihna certificate reng reng ah ‘In accordance with the Mizo Marriage Divorce and Inheritance of Property Act, 2014’ emaw ‘See Section 7 of the Mizoram Divorce and Inheritance of Property Act, 2014’tih ziah lan vek a ngai tawh dawn a. He Dan kan sawi hian kohhran hrang hrang ten inneihtirtheitu (Licensed Officer)a hman lai te chu a pawm nghal a, he Dan hman a nih atang hian kohhran leh sawrkar pawmpui thlap a inneih buatsaih a ni tawh thung dawn a ni, a ti. Inneihna reng reng chu ni 30 chhungin innei ten mahni bialtu Marriage Registrar hnenah in register ngei ngei tur a ni, a ti bawk.
Pu Lalsawta chuan hetia kohhran hruaitute nen sawi ho a nih tak ah chuan he Dan hmang tur hian sawrkarin notification a chhuah vat dawn a ni tih a sawi a. Minister hi Law Secretary, Pu P.Singthanga leh Deputy Secretary Pu Zahmingthanga Ralte ten an tawiawm a. Mizoram Kohhran Hruaitu Committe hi an chairman Pu Rev. K.Lalhmuchhuaka leh General Secretary Pu R.Lalrinsanga ten an ho a ni.
He hunah hian Law Minister chuan Mizoram Code Volume VII-X a tlangzarh nghal bawk a. Mizoram Code hi Mizoram in Legislative Assembly a neih kum 1972 atanga Dan an lo siam tawh te lakkhawmna a ni a, hei bakah hian Sawrkar-in Dan tesep a siam chi hrang hrang a chuang bawk. Pu Lalsawta chuan kiltin kiltang dap ngai lova hmun khata hmuhtheih mai tur a Dan lakkhawm hi Law Department hna peng pakhat a ni a, tunah hian chu hna chu chak tak a kalpui a ni tih a sawi. Heng Mizoram Code chhiar leh rawn duh tan Law and Judicial Department Library ah hmuh theih reng a ni. Minister hian MJA Library atan set 1 (Volume I-X) chu a pe bawk.
