DM & R Minister Pu Nihar Kanti Chakma chuan vawiin chawhma khan Central YMA Hall, Tuikhuahtlangah ni thum awh tur Training on Basic First Aid a hawng. He training hi National Disaster Management Authority (NDMA) leh Disaster Management & Rehabilitation Department, Govt. of Mizoram ten YMA member te leh Taxi driver te puala an buatsaih a ni.
Pu N.K. Chakma chuan Chhiatrupna (disaster) hi tunlaia ram hrang hrangte buaipui ber a ni tih sawiin Mizoramah pawh kumtinin chhiatna kan tawk thin tih a sawi a. Chhiatna lo thleng tamtak hi chu mahni kan inthlen chawp a ni thin a; chumi laka himna damdawi tha ber pakhat chu 'Fimkhurna' a ni a ti a. Japan ram chanchin atangin inbuatsaih lawkna avangin chhiatna tamtak a pumpelh theih tih a sawi a. Taxi khalhtute chu hmuntina kal thin an ni a, midangte tanpuitu tangkai tak an ni thei tih sawiin training-a kalte chu midang tanpui thei tura inzir chhuak ngei turin duhsakna a hlan a ni.
Pu R. Lalngheta, CYMA Treasurer pawhin thu sawiin chhiatrupna a lo thlenin mi tlawmngai, hetiang lama thiamna nei si lo tamtak kan kal khawm thin a, chu chuan chhanchhuah hna kawng tamtakin a ti khaihlak thin tih a sawi a. Hliam leh mangangte chhanchhuak turin awmze nei leh sawt zawka kan thawh theihnan training kan mamawh em em tih a sawi a ni.
DM & R Training hawnna inkhawm hi Pu Dominic Lalhmangaiha, State Project Officer, UNDP in a kaihruai a. Training hawnnaah hian Zoram Taxi Drivers Association (ZTDA) leh Central YMA hruaitute an tel bawk. Training hian 31st May - 2nd June, 2011 a awh ang a; Group 'A' Taxi khalhtute leh YMA branch 30 thlan bik atangin member thahnem vawiinah an train ang a, Group 'B' leh 'C' Taxi khalhtute leh YMA branch dangte naktuk leh naktipah he training-ah hian an tel ang. He training-ah hian Trained Nurses Association of India (TNAI) atangin mithiamten hliam enkawl dan leh First Aid pek dan an zirtir a ni.
DM & R Department hnuaiah hian Search & Rescue atan mi 10,624 an train chhuak tawh a; First Aid atan mi 9,077 an train chhuak tawh bawk. Khua leh Veng tinah Disaster Management atan ruahmanna siamin committee din a nih bakah Chhiatrupna lo thlen huna Emergency Ambulance atan Taxi te hi ruahman an ni bawk a ni.
