Mizoram Public Works department (MPWD) chuan National Highway siamna tur sum surrender chungchang sawifiahna a hnuai ami ang hian an nei :

Chanchinbu thenkhata lo lang, Mizoram chhung National Highway siamthatna tur sum tam tak surrender a ni, tih lo lang khan hnathawh muan avanga sum awmsa tam tak hmang hman lova surrender ta anga ngaih theih a ni a. Thil awm dan chu hetiang hi a ni. Rs. 4140.00 lakhs surrender anga sawi hi a dik lova. RTI zawhna chhannaah Maintenance pangngai (Ordinary Repair) a hmanral zat chauh sawilan a ni a. Hei bakah hian Flood Damage Repair leh Special Repair a hmanral zat Rs. 1840.00 lakhs leh Periodic maintenance a hmanral Rs. 601.00 lakhs sawi tel a ni lova. Chuvangin surrender zat chu Rs. 1699.00 lakhs a ni zawk. Kawng maintain na pangngai (Ordinary Maintenance) leh Fur tih chhiat (Flood Damage) Repair-na atana sum awm chu hman zawh loh emaw surrender emaw a awm lo.

Periodic Maintenance (hei hi re-surfacing a ni deuh ber) atan Rs. 2300.00 lakhs ruahman (allocate) a ni a. Sum ruahman hi hna sanction phawt loh chuan hman mai theih a ni lova. Sanction hi hna pasarih a awm a. Chung zinga hna panga chu March thla chawhnu lam 2011 ah sanction chauh a ni a, sum hman hman ngaihna a awm lo. A bak hna pakhat NH-150 a mi chu a kaltluang pangngai a, heta tan hian Rs. 601.50 lakhs hman a ni. A dang pakhat leh NH-44A a ni chu tender chhangtu awm loh avang leh tender nawn a ngaih avangin pawisa hman hman loh a ni bawk. Ministry of Road Transport atanga sanction hmuh tlai avang leh tender chhangtu awm loh avangin Periodic Maintenance fund hi Rs. 1699.00 lakhs surrender a ni ta a ni. Hna sanctioned tawhte atan hian sanctioned tawh angin sum hman theih tho tur a ni.