Mizorama zu khap burna dan MLTP Act zirchiang tura sorkar-in a din Study Group-te chu vawiin chawhma khan I & PR Conference Hall-ah an Chairman Pu H. Raltawna hovin a vawi 3 na an thukhawm a, member te an kal tha hle.

Vawiina thutkhawmna ah hian agenda chhawpchhuah 6 bakah thu dang thenkhat rela sawiho a ni. He Study Group in tlawmngai pawl hrang hrangte hnena zawhna a zawh hmuh kim anih tawh thu tarlan niin tha taka zawhna chhangtu NGO te hnenah lawmthu a sawi a. Tlawmngai pawlte chhanna te hi hun remchang hmasaah sawiho zui zel tura dah rih an la ni.

Zu in Mizo khawtlang nuna nghawng a neih dan leh ei leh bar a nghawng dan chungchang zirchiang tura Sub-Group a dinte chuan report felfai tak an la peihfel loh thu committee ah hian hriattir niin anmahni mai bakah phungbawm dangte sawma zirchian an la duh thu sawiin an hun pawh June thla chhung atan pawhsei sak an dil chu remtih nghal a ni a. Hetih lai hian committee hmasain a lo ngen tawh MZU Psychology Department te chuan Mizoram pum huapa research puitling tak buatsaih an rilruk dante hemi hian sum leh pai senso tur engemaw zat a neih theih dante report a ni a. MZU lam pawh hi in hawng hlein sum sen tur 60% zet chu an inhuam ve thu pawh sawilan a ni a, a tlem thei ang bera hisapin research kalpui nana hian Rs. nuai khat zet mamawh tura rin a ni nghe nghe a ni.

Committee chuan uluk taka a ngaihtuah hnuin Sub-Group leh MZU lamte hi thawkho thei sela, an hmalakna pawh thuang khata kalpui nise an sum mamawh turte pawh Mizoram sorkar ah thlen sak nise tiin a rel zui a ni. Study Group in Mizoram Police Department atanga thu hriat duh a neihte pawh ngen nawn leh nise tia rel a ni. Zu avanga natna tuar leh thi te medical lam report pawh ngaihthlak a ni.

Tarlan tawh thin angin kum 14 zet Mizorama MLTP kalpui tawh chungchang zirchiang tura din Study Group te hi July 24, 2011 thleng hun nei an ni a. Committee din chhan ber chu zu leh a kaihhnawih thil chipchiar taka zira innghahna tlak hmuhchhuaha vawnthat a ni.

Vawiin Committee ah hian Study Group hun, thla ruk dang pawtsei tura sorkar ah ngenna siam remtih a ni bawk.