April ni 10, 2012 atanga tan D3 Inter-Village Volleyball Championship chu nizan khan Ramhlun Sporting Club Field, Ramhlun ‘N’-ah zawhfel a ni ta a. He Championship ah hian a vaiin Team 27 an tel a, Final-ah Maubawk Local Council Team chuan Nursery Local Council Team chu 3-1 in an hneh a ni. Championship kharna hun hi

Parliamentary Secretary Pu Lal Thanzara’n a hmanpui a, infiammite hmasawnna tura hmalakna tha reng reng chu sorkarin a tanpui zel dawn a ni, a ti. Parliamentary Secretary Pu Lal Thanzara chuan thalaite hmakhua ngaiin Mizoram sorkar chuan infiamna chi hrang hrangah ‘Catch Them Young’ programme chak takin a kalpui a, a hlawhtlinna kan hmu mek zel a ni, a ti. Football lama Mizo thalaite tuina leh talent neih thatzia sawiin FIFA meuh pawhin Mizoram-ah Football Academy rawn din a tum ta hial a ni, a ti bawk.

Mizorama Volleyball Championship tangkafai lawmman tam berna kharna inkhawm hi Organising Committee Chairman Dr. Robert Rualthankhuma’n a kaihruai a, Aizawl West-III bialtu MLA Pu R. Selthuama leh Aizawl Municipal Council Chairman Pu C.T. Zakhuma ten inkhel hi a hmunah an en ve a ni. He tournament-ah hian Champion team Maubawk chuan Rs 50,000/-, Trophy leh Certificate an dawng a; pahnihna Nursery Veng LC Team in Rs 20,000/-, trophy leh certificate an dawng a; semin final thleng phak team pahnihten Rs 5000/-, trophy leh certificate an dawng bawk. He tournament-a team tel zawng zawngte chu Rs 1000/- leh certificate pek vek an ni nghe nghe.