Vawiin khan nileng awhin damdawi hmandan te, hriselna leh a hmansualin AIDS natna thleng a chawh chhuah theih dan chungchang inkawhhmuhna lam hawi Workshop chu I&PR Auditorium-ah nghah a ni a, dan leh thupek kengkawhtu Police, Excise & Narcotics bakah Social Welfare Department, tlawmngaipawl hrang hrang leh 26 Assam Rifles mi pawimawh ten an chhim a ni.

UNODC Asia chhim chhak bialtu Project Coordinator Kunal Kishore kaihhruaiah hian MSACS Project Director Dr. Eric Zomawia’n kalkhawmte lawmna thu a sawi zawh hnuin Health Minister Pu Lalrinliana Sailo chuan Workshop hi a hawng a ni. Minister chuan khawvel pumin a do damdawi hmansual leh tawlhruk chungchangah ram hrang hrang chet lak dan a inthlau hle a, ram thenkhatah phei chuan hetianga inhnamhnawihte chu thih thlenga hrem theihna dan an kengkawh hial a ni, a ti a. Damdawi ruih theih chi khauh taka khuahkhirh hian damdawi in lian zawk angah te phei chuan an damlo te enkawl chungchangah harsatna a thlen ve chang a awm bawk thin a ni, a ti. Heng thil chi hrang hrang thlir hian dan leh thupek kengkawh tu te pawhin mihring mamawh leh an tana tha ber tur ngaihtuah chunga an tihtur dik tak an tih hi a pawimawh a ni, a ti a, a nihna tur dik taka damdawi hman leh damlo te mamawh ber thlira damdawi chelek kawngah pawh kalphung chintawk neih thiam a pawimawh ber thu Health Minister hian a tarlang a ni.

Workshop thuhma sawitu Kunal Kishore chuan damdawi ruih theih khuahkhirh kawngah chuan Supply Reduction leh Demand Reduction te hi kawng pawimawh lian pahnih an ni, a ti. Vawiin Workshop-ah hian MSACS Project Director Dr. Eric Zomawia; Dr RL Sanghnuna, Synod Hospital, Durtlang bakah MSACS, UNODC leh Social Welfare Department atanga mithiam ten thupui hrang hrang neiin an zirtir a, ngaihdan sawihona leh inhrilhfiahna te nen hun hlawkthlak tak hman a ni.