Vawiin khan Parliamentary Secretary Pu S.Laldingliana chuan a bial chhung Runtung khaw pawh tur kawng laih zawh tak a hawng.
Runtung khaw kawngthar hawnna puala inkhawm hi Runtung Community Hall-ah neih a ni a. Inkhawmna hun hi Pu H.Lalramzauva VCP Runtungin a kaihruai a. He huna thusawitu Pu S Laldingliana chuan Runtung khua in kawng tha an nei ve thei ta chu lawmawm a tih thu sawiin \" Vawiin hi Runtung khaw tana ni chhinchhiah tlak a ni a. Hun lo la kal zel turah pawh theihtawp chhuah a kawngpui chei chhunzawm hna pawh kan kalpui zel ang, he kawng hian Runtung khaw tan mawlsawmna thlen zel se la ka duh a ni\" a ti.
Thusawitu dang Pu John Tanpuia MCS, BDO Lungsen chuan Runtung kawng laih a nih theihna tura hmalakna hrang hrang technical report a pe a. He project huam chhung khaw hrang hrang a hmasawnna kal lai mek te a tarlang tel bawk.
In 32 awmna khua Rungtung hian kawng tha an neih loh avangin harsatna tam tak an tawk thin a, he an manganna te hi bialtu MLA a nihna angin Pu S.Laldingliana hian theihtawp chhuahpuiin Kawng laih hna hi tan a lo ni a. Kawng thui zawng hi km 8.165 a sei a ni a. kawng laih nan hian Rs. nuai 30 chuang sen ral a ni.
Hemi hnu hian Runtung khaw mipuite tan Free clinic buatsaih a ni a. Damlo te enkawl turin Lunglei Civil Hospital atangin Doctor 4, nurse 1, Pharmacist 1, Technician 1 driver 2 an thawk chhuak a ni. He free clinic ah hian dam lo mi engemaw zat an inentir nghal a ni. Kawng thar lawmna ruai khawtlangin an buatsaih chu hlim taka kilho a ni bawk.
