National e-Governance Plan hnuaia State Mission Mode Project 32 zinga project pawimawh tak pakhat ‘e-District’ chu Mizoramah a vawi khatna atan vawiin khan Aizawl DC Office Chamber-ah ICT Minister Pu Zodintluanga’n a hawng. Mizoramah chuan Aizawl e-District hi a hmasa ber a ni a, hlawhtling taka puitlin a nih avangin District dang zawng zawngah pawh e-District Centre hawn tum thuai a ni. Aizawl e-District in a tum ber chu mipuiten a hmun pan ngai lova an awmna hmun atanga internet kaltlanga awlsam taka DC Office an dawr zung zung theihna tura kawng ruahman a ni.

Aizawl e-District hawnnaah ICT Minister Pu Zodintluanga chuan rampumah e-District enchhin nana state 14 thlan zingah hmarchhak state 2 - Assam leh Mizoram - chauh thlan an ni a, heng state 14-te zingah zel pawh Mizoram chu ti tha ber a nih avangin project hlawhtlin nana tha leh zung sengtu Department hnathawk zawng zawng te chungah lawmthu sawiin an taimakna leh inpekna chu chhuanawm a tih thu a sawi. ICT Department chu department naupang tak leh hriat la hlawh lo tak ni rih mahse hmalakna tam tak a nei mek a; Mizo thalaite tan IT hmanga eizawnna tlak hna siam sak chho zel a nih theih tur pawh a sawilang a ni. ICT Department-in project a kalpui mek ‘Software Technology Park’ leh ‘State Data Centre’ din hunah phei chuan thalai tam takte tan hna a awm dawn a; sorkar chuan Mizo thalaiten IT lamah talent an nei thatzia hre rengin, tunlai khawvel rilru leh thiamna milin thalaite hmakhua a ngai reng a ni, a ti. Mizoramah e-governance zau zawka hman a nih theih hunah chuan mipuite tan thuthar hriat leh sorkar pisa dawr a awlsam sawt dawn piah lamah sorkar hmalakna reng reng chu mipuite chhui reng theih tura langtlang taka tih a ni vek thei dawn bawk a ni, a ti. Mizoram hmun hrang hrang-ah Information Centre 136 din ni tawh mahse khaw kilkhawr zawkte mamawhna avangin NEC bultumin “Rural Kiosks” 300 lai din phalsak a ni a; Internet-in a thlen phak lohna hmunah pawh Satellite hmangin heng Rural Kiosks-ah hna a thawh theih dawn a ni tih a sawilang bawk. Sorkar chuan hmun kilkhawr tak taka awmte tan heng Centre/Kiosks-ah te Computer, Scanner, Printer leh Digital Camera thleng pawhin pek a tum mek thu a sawi bawk a, khawpui zawk pan ngai lova an khua ngeia heng hmanrua hmanga mipuiten an mamawh an phuhruk thei tawh dawn a ni, a ti.

Aizawl e-District hawnna inkhawm kaihruaitu ICT Principal Secretary Pu S.S. Garbyal chuan he Centre kaltlangin mi mawl ber tan pawh DC Office dawr a awlsam tawh dawn a, sorkar tan pawh rang taka mipuite tan rawngbawl sak theihna kawng tha tak a ni, a ti.

Aizawl DC Dr Franklin Laltinkhuma pawhin thu sawiin ICT Department hmalakna a fak a, tunlai khawvel kalphung milin hun hek lo leh awlsam thei ang bera mipui leh sorkar indawr tawnna atan e-District peihfel a ni ta chu a lawmawm tak zet a ni, a ti.

ICT Department-a Principal Informatics Officer Pu Lalthlamuana chuan e-District tobul leh Mizoram tana an hmalak dan chungchang a sawi a. Rampumah mipuiten sorkar an dawrna atana kum tin sum hmanral zat chu cheng vaibelchhe 1200 hu vel a ni a, e-District hman a nih hnuah chuan tul lova hun leh sum tam tak sen chu a tawp thei dawn a ni, a ti.

Aizawl e-District atang hian service chi hrang hrang 12 pek chhuah a ni a, chungte chu - Income Certificate, Residential Certificate, Scheduled Tribe/Caste Certificate, Inner Line Permit, Tax Exemption Certificate, Housing Loan Clearance Certificate, Bakijai Clearance Certificate, Land Valuation Certificate, Land Acquisition Order, RTI Services, Public Grievance Redressal leh Disbursement of Funds - te a ni a. Heng service hrang hrangte hi on-line a pek chhuah a nih theih nan Mizoram Citizen Service (e-Governance) Rules, 2010 pawh ni 21 October, 2010 khan siam a lo ni tawh a. Mipuite tan pawh DC Office kal kher lovin Aizawl khawpui chhunga veng hrang hrang 40-a Mizoram Online Service Centre atangin heng service te hi pekchhuah theih tawh a ni. Aizawl khawpui chhung bakah Aizawl District-in a huam chhunga SDO Offices - Sakawrdai leh Saitual - atangte leh RD Block Offices - Aibawk, Darlawn, Phullen, Thingsulthliah leh Tlangnuam - atangte pawhin heng service-te hi pek chhuah theih an ni.

Aizawl e-District Project hi ni 9 April, 2010 atanga duan tan a ni a, cheng nuai 315.88 senga peihfel niin 4 March, 2011 atang khan hman tan chhin (“Go Live”) a lo ni tawh a. He project hian Security Auditing leh Testing zawng zawng paltlang vekin, STQC Certified a ni a, India ramah Uttar Pradesh dawtah a hlawhtling hmasa ber pahnihna a ni nghe nghe. He Centre atanga Certificate pek chhuah tawh zawng zawng chu ILP - 10,505, Residential Certificate - 7234, Caste Certificate - 9234 leh Income Certificate - 3736 a tling tawh a ni.

e-District hi sorkar laipuia Department of Electronics & IT bultum vek a ni a, Mizoramah chuan Mizoram State e-Governance Society (MeGS) hnuaiah dah a ni. District tinah District e-Governance Society (DeGS) din a ni a, hei hi DC theuhte Chairman-na hnuaiah a awm dawn a ni. DeGS hian District tina e-District Centre te inrelbawlnaa thuneitu ber tur an ni.