Vawiin khan Parliamentary Secretary to Chief Minister Pu Lal Thanzara hovin Sub-Committee chhawnghnih Fire Prevention Sub-Committee leh Green Mizoram Sub-Committee Chief Minister Conference Hall-ah an thukhawm.
He Committee hi an Chairman Pu Lal Thanzara’n kaihruaiin Member-te hnenah thahnem ngai taka kangmei ven chungchanga an hnathawhah lawmthu a sawi a. Kumin 2012 chhunga State Level Fire Prevention Committee hmalakna hrang hrangte an thlir a, a lawmawm an ti hle. Ram ti kangtu chunga hremna lehkawh chungchangah V/C leh Police te hmalakna lawmawm an ti hle bawk.
Kumdanga tih thin ang bawkin kuminah pawh hian District leh Village Level Award dawng tur thlan leh nise an ti a. Heng award dawngtu tur endik hna thawk tur hian hetiang hian ruahmanna an siam. Champhai District-ah SENVA; Kolasib District-ah AMFU; Serchhip District-ah CYMA; Lawngtlai leh Saiha District-ah NSS; Lunglei District-ah ASEP; Mamit District-ah MUP leh Aizawl District-ah STAM te an ruat a ni.
Pu Lal Thanzara, Green Mizoram Sub-Committee Chairman chuan Committee chhawng hnihna Sub-Committee on Green Mizoram kaihruaiin Green Mizoram hnathawh tlangpui leh a hlawhtlinnate a sawifiah a. Nikuma Green Mizoram hnathawh hlawhtlinnate an thlir zui nghal a, hmalakna ah lawmawm an ti hle.
Kumdanga tih thin ang bawkin kuminah pawh hian Green Mizoram Day hman dan tur State Level-a pharh turin ruahmanna an siam a. Hmachhawp hrang hrangte pawh State Level Committee a thlen turin an rel bawk.
He Sub-Committee chhawng hnihah hian member-te an kal tha hle a ni.
