Champhai bial tlawh mek Education Minister Pu Lalsawta chuan nimin khan Champhai-a zirna in hrang hrang - Govt.Champhai College, District Resource Centre (DRC), Zotlang leh Polytechnic, Tlangsam - te a tlawh a. Nizan khan Venglai Community Hall-ah Champhai-a zirtirtu hrang hrang Primary atanga College thleng ko khawmin meeting a neih pui a, infuih tharna hun hmangin zirna kalphung thar chungchangte an sawiho a ni.

Zirtirtu kalkhawmte hmaa thu sawiin Education Minister Pu Lalsawta chuan Mizoram-ah missionary ten zirna bul an rawn tan chhoh dan sawiin Kristianna leh zirna a kal dun zel a ni, a ti. Zirna tha tluantling nei tur chuan building tha leh naupang thiam aiin zirtirtute inpekna a pawimawh fo zawk a, mahni eizawng theih tur khawpa zirlai naupangte chher hriam a pawimawh ber a ni, a ti. “Kan ram hi zirna hmangin i siam tha ang u” tiin Pu Sawta chuan zirtirtu kalkhawm te a fuih a ni.

Inkhawm kaihruaitu Pu K. Lalrintluanga DEO Champhai chuan zirna kawnga kalphung thar chu Education kalphung tih danglam tumna a ni lova, a nihna her danglamin tunlai khawvel hmasawnna mil zela kan naupang leh thalaite zirtir hi a ni zawk, a ti.

Education Minister hi Pu Lalthakima, Dy. Director School Education, Pu Lalsiamthara, Addl.Project Director SSA Mission leh Pu R.L.Thianghlima, Principal DRC Zotlang ten tawiawmin zirtirtute nen zawhna leh chhanna hun zau tak an hmang a ni.

Minister hi tukin zing dar 7:00 khan 1st General Assembly of Champhai North Constituency Students Union hmanpui turin Hnahlan panin a chhuak leh nghal a ni.