Vawiin khan JNNURM hnuaia City Development Plan (CDP) Policy Committee chu an Chairman UD &PA Minister Pu Zodintluanga hovin Secretariat Conference Hall, New Secretariat Complex-ah an thukhawm.

Jawaharlal Nehru National Urban Renewal Mission (JNNURM) hi 2005 kum tawp lama sorkar laipuiin India ram khawpui hrang hrang te cheithatna tur ruahmanna a siam niin Mission City a thlan chhuah 63 zingah Aizawl pawh a tel a. JNNURM thawhkhatna kalpui dan tur ruahmanna City Development Plan  pawh Aizawl khawpui tan siam a lo ni tawh a ni. Khawpui a than ang zelin CDP hi ennawna, belh ngai te belha, siam that ngai lai siam that a tul avang leh JNNURM thawhhnihna kalpuina turin Revised CDP siam a ngaih avangin vawiin a Policy Committee hian uluk takin a thlir a. Aizawl Development Authority in Draft Master Plan for Aizawl Vision 2030 a lo siam tawh nen kal kawp tlat tur anih angin he Master Plan pawh hi uluk takin vawiin meeting-ah hian thlir ho a ni bawk.

Minister Pu Zodintluanga chuan member kalkhawm te hmaah City Development Plan pawimawhzia leh duan uluk a tul zia sawiin Aizawl khawpui cheina tur leh hma a sawnna tur kalkawngah he Plan hian thui takin ro a rel dawn a, Department hrang hrang ten Aizawl hmasawnna tur hma thar an lakna kawngah CDP nen a inkalh emaw, inmil lo emaw a awm a nih chuan sorkar laipui atanga sum hmuh a harsat thu a tarlang a ni.

Meeting chuan siamthat ngai lai an tih te an sawiho hnuah CDP Policy hnuaia Technical Committee ten uluk takin zir se, thla khat chhungin an report te thehlut se tiin thu an dah a ni