Tukin zing khan VDP Electrict Veng, Aizawl te leh Food and Drug Control Administration a Drug Inspector te chuan Zuangtui ah Hritlang Damdawi atana hman thin, NAM COLD thahnem tham tak an man.
   
Damdawi thahnem tham tak tawlhruk tum neitu te hi Tahan lam mi niin Saithanruma kum 33, s/o Lianchungnunga, Tahan, tuna Electric veng, Aizawl a cheng mek leh Lalzawra, kum 44, s/o Chalthianga, Tahan, tuna Electric veng, Aizawl a cheng mek te anni a, heng an mi man te hi Drugs and Cosmetic Act 1940 hnuai a Section 27(b)(ii) a thubuai siamsak nghal an niin kum 1 atanga kum thum thleng Lung In tan tir theih leh Rs.5000/- thleng chawi tir theih an ni. NAM COLD (Hritlang Damdawi) hi avaiin case 19 zet ani a,  strip 850 niin strip khat hi an lakna ah chuan Rs.19.00 in an la a, a printed ah chuan Rs.25.80 niin Mandalay (Myanmar) ah Rs.30/- a hralh leh tur a ni. A vaiin an lakna ah chuan Rs.3,06,850/- man a ni.
    
Heng Damdawi te hi Chemical process mawlte hmangin Damdawi ruihtheih a siam leh theih ani a, METAMPHETAMINE leh AMPHETAMINE damdawi ah te an thlak leh ta thin a, hengte hi khawvel a thalai tam tak te'n a damdawi an hmansual lar tak a ni.
    
Food and Drugs Administration te hian hmanrua an nei chau hle a, an thil man te han phurhna mai tur an neih loh mai bakah Drug Inspector te tak ngial pawh hian a tul thulh a hman tur Motor an nei lova, Enforcement staff an neilo bawk a, nunna atana hlauhawm tam tak te paltlang a ngaih avangin tun aia changtlung zawka thuam that nise an duh hle.