5041/2025-2026

Dated Hnahthial, the 30th March, 2026: South Tuipui Bialtu MLA, Pu Jeje Lalpekhlua chuan vawiin khan damdawiin a damlo awmpuitute hahdamna leh riahna hmun tur - Patient Attendant Shelter chu khuallian niin a hawng a. A hmanna tur dik taka hmang ngei turin a enkawltu turte chu chahin mi harsa zawkte chu lo duhsak thin turin a chah bawk.

Khuallian chuan damlo enkawl tura kalpui, thlenna neih that loh vanga harsatna tawk thinte chu a hriatthiampui thu sawiin chu harsatna sutkian nan Hnahthial District-ah Patient Attendant Shelter hawn a ni ta chu lawmawm a tih thu a sawi a. He building awm theih nana hma latu leh thawktu zawng zawngte chungah lawmthu sawiin a nihna tur dik taka hmang a, mi harsa zawkte duhsak nachang hre thin turin a chah a ni.

Khuallian, Pu Jeje Lalpekhlua chuan Hnahthial District-ah hmasawnna tam tak a hmuh tak thu sawiin District inlungrual tak an nih avanga heng hmasawnna te hi thleng a nih thu a sawi a. Hnahthial District tan a nih chuan mahni awmna rawng te dahtha a, theihtawp chhuah thin turin thawh ho puiah kalkhawmte chu a sawm nghal a ni.

MLA chuan a ngaih pawimawh zualte sawina hun hmangin Mizoram Universal HealthCare Scheme (MUHCS) chu mipui tam zawkten hmang thei se a duh thu leh a thatna tem tawh te chu an inchhir ngai loh thu a sawi a. Hei bakah hian kawlphetha a Hnahthial a intodelh theih nan 132kV sub station nei vat turin theihtawp an chhuah mek thu a sawi bawk. Boxing hall pawh sak tan vat a nih ngei a beisei thu sawiin mipuiten fur an tuar nat loh nan SASCI sum hmangin khaw chhung hmun hrang hrangah drain siam hna kalpui mek a nih thu a tarlang nghal a ni.

Hawnna programme hi Pu Zothanmawia Khiangte, Addl DC chuan kaihruaiin Technical Report hi Er. Lalhmingthanga, JE, UD&PA hnen atanga ngaihthlak a ni a. Sawrkar officials hrang hrang bakah NGO leh Village Council hruaitute chu he programme-ah hian kalkhawmin Pu Hmingmawizuala, District Urban Development Officer chuan lawmthu sawiin hun a khar a ni.

Hnahthial District-a Patient Attendant Shelter hi Shelter For Urban Homeless Scheme hnuaiah Urban Development & Poverty Alleviation (UD&PA) Department chuan cheng nuai sawmthum pariat,sing riat leh zali sawmli (₹38,80,440) sengin an sa a. March ni 6, 2024 khan sak tan niin May ni 26, 2025 khan sak zawh a ni.

Building-ah hian floor hnih awmin Ground Floor-ah hian bedroom pahnih (2), sitting room pakhat (1), toilet pakhat(1) leh choka pakhat (1) a awm a. First floor-ah hian bedroom pakhat(1), Dormitory pakhat (1), Toilet pahnih (2) leh sitting room pakhat (1) a awm a ni.

Patient Attendant Shelter hi District Hospital bul lawkah awmin a enkawl chhunzawm hna hi Hnahthial District Hospital kutah dah a ni.