No.7043/2020-2021

Nimin January Ni 1, 2021 leh vawiin January Ni 2, 2021 khan Indo-Myanmar ramri kaltlanga dan lova Kuhva lakluh thlai hrik pai, thlai dang tana himlo hmuhchhuahte chu dan anga hmalak anih hnuah Plant Quarantine Station, Zokhawthara halralna hmun Incinerator-ah Executive Magistrate, Police leh Agriculture Department-te hriatpuinain halral a ni.

October, 2020 thla tir aṭang tawh khan dan anga ram pahnihte insumdawntawnna luhkapui tura ruat Notified point of entry Zokhawthar ni lo kawng ruk atangin endikna quarantine inspection paltlang lovin kuhva ro Arecanut lakluh thin a ni tih hriat a ni a. Pu R.Lalrinawma MAS, Officer -In-Charge, Plant Quarantine Station, Zokhawthar kaihhruaiin Mobile Plant Quarantine Inspection kalpui chhoh nghal a ni a, December Ni 11, 2020 khan kuhva hrik zing a mi, kuhva chauh lo pawh thlai chin chi dang 100 chuang khawih chhe thei Polyphagus storage pest Araecerus spp. hmuhchhuah a ni a, Champhai District Administration hnenah endikna atanga  rannung hmuhchhuahin kan ram thlaite tana pawi a khawih theih dan leh hmalak a nih loh chuan Indian bio-security tana thil pawi a thlen theih dante thlen niin, Bawrhsap Pi Maria C.T Zuali ruahmannain Agriculture Deptt, Plant Quarantine Station, Zokhawthar chuan chak taka hma la nghalin,  Pu Obed Lalmalsawma, SDC, Executive Magistrate vilna hnuaiah Champhai leh a chhelvela  Godown 40 (sawmli) endik a ni a, heng zinga Godown 4 (pali) a kuhva dahte chu he rannung hian a khawih chhe mek tih hmuhchhuah a ni a. He rannungin a khawih chhiat mek kuhva ro Kg 9700 chu la hrangin, a inthlahpung zel tur tihtawp nan leh India rama a luh zel loh nan Plant Quarantine-in thlai lakluh leh thawnchhuah chungchanga inkaihhruaina a duan zulzuiin January Ni 1 leh Ni 2, 2021 hian Plant Quarantine Station, Indo- Myanmar Border Trade Centre , Zokhawthara halralna hmun (incinerator) ah halral a ni.

India ram leh khawi ram pawhin Agriculture bungraw hmanga insumdawn tawn dawn chuan India ram thlaite himna tur hi Sawrkar laipuiin a dah pawimawh hle a, Destructive Insect Pest Act, 1914 tlawhchhanin Plant Quarantine Regulation of Import into India Order 2003 a duanga, he dan hmang hian duhdan leh kalphung tur (regulation) fumfe tak  zam a ni. He dan hian Agriculture bungrua lakluhna kawngkapui (Notified point of entry) atan Zokhawthar Land Custom Station hi a puang a. Plant Quarantine (Regulations of Import into India), Order, 2003, Clause 3 (18) leh Clause 3 (21) in a phut angin ram dang aṭanga Agriculture bungrua lalut tur chuan a thawnchhuaktu ramin India ram lut turin thlai natna hrik, rannung leh hlo chi a keng tel lo tih tarlanna Phytosanitary certificate a rawn nei tel ngei tur a ni. Bungrua a lo thlen rualin an certificate rawn kente nen hian an bungraw rawn thawnchhuah hi a inmil em tih enfiah turin quarantine inspection neih ngei a ṭul thin a ni.