No.7042/2020-2021 

          Vawiin khan Aizawla hmun pahnih Aizawl East District a ITI Urban PHC ah leh Aizawl West District a Chawlhhmun PHC ah te Covid 19 Vaccination Dry Run neih a ni a, hei hi Covid 19 Vaccine alo thlen huna felfai taka a dawngtu tur te hnena  pek dan tur leh ruahmanna a tha tawk em tih enchhinna a ni.

           COVID 19 hridanna hi India sawrkar laipuiin pek chhuah mai theih turin a inbuatsaih nasa hle a. He hridanna hi tun maia supply a tam tawk loh avangin National Expert Group on Vaccination of COVID 19 (NEGVAC) chuan a hmasa berah Damlo enkawltute (Healthcare Worker) te pek hmasak turin State tin te a inbuatsaih tir a ni. Damlo enkawltute hi COVID 19 vanga na leh natna dangte an enkawl avangin, annin hripui an kai chuan mipui vantlanga a sawhkhawk a nasat lehzual dawn avangin NEGVAC chuan COVID 19 hridanna la hmasa turin healthcare worker te hi a ruat a ni. 

              He COVID 19 hridanna hi hridanna dang anga pek a ni dawn lova. Damlo enkawltute hming list lo thehlut tawhte chuan sms hmangin hridanna an lakna hun leh hmun tur hriattirna an dawng ang a, anni chuan chumi hmun chu an pan ang. Chutah chuan inthlanna-a kan tih dan angin Photo identity card engemaw ber nen  kalin, duty te'n an lo endik hmasa ang a, list ah an chuang ngei e tih leh anmahni an ni ngei e tih enfiah hnuah COVID 19 hridanna chu an la ang. He hridanna pek chungchangah hian sawrkar laipui chuan UNDP hmalakna in a hranpa ngata software CoWIN chu siamin, chumi ah chauh chuan record tur a ni.

              Chutiang chu lo aitechhin nan vawiin 2nd January 2021 hian India ram puma State khawpui zela neih tura tih a nih angin Mizoramah pawh Aizawl East District-a ITI Urban PHC ah leh Aizawl West District-a Chawlhhmun urban PHC ahte neih a ni. He lo tihchhinna hi Dry Run tia sawi a ni a. Hridanna dawngtu tur mi 25 kovin a nih dan tur ang taka a pekna hmun tura ruata pek chhin an ni.  Amaherawhchu COVID 19 vaccine a lo la.thlen loh avangin vaccine tak tak erawh pek an ni rih lova, he Dry Run hian a tum chu,  COVID 19 vaccine pe tura State tin lo inhmakhua a, harsatna awm te bawhzui nghal a, a hun taka rokhawlhna awm lo thei ang bera hridanna pe tura lo inpeih hi a ni.