No.5322/2020-2021

Dated Champhai, the 22nd September, 2020: District Court Champhai thupek bawhzuiin vawiin chawhnu khan dan lova Vawk phurh man 10, Vawk puitling 3 leh Vawk note 7 te chu AH & Vety. Complex Champhaiah kahhluma phum fel an ni.

Vawk Note 7 te hi kumin August Ni 19, 2020 a Tlangsam daia mante an ni a, Vawk puitling talhrual 3 mante hi September Ni 17, 2020 a Zote kaia mante an ni. Heng Vawk mante hi A.H& Vety. Department, Champhai ruahmannain Porcine Reproductive and Respiratory Syndrome (PRRS), Classical Swine Fever (CSF) leh African Swine Fever (ASF) natnate an vei leh vei loh endik anih hnuah PRRS leh CSF natnate an vei tih hmuhchhuah a ni a. Heng hrikai Vawk 10 (Sawm) te hian hri an tihdarh zel lohna tur leh District Court Champhai thuchhuak angin vawiin hian kahhluma, a phumna tur bika siamah uluk taka phum nghal an ni.

AH & Vety. Department Champhai chuan District Magistrate-in ram dang leh state dang atanga Vawk, vawksa leh vawksa atanga siam reng rengte Champhai district-a lakluh khapna leh Champhai district chhung khawi khuaah mah Vawk, vawksa leh vawksa atanga siam reng rengte lakluh leh phurhchhuah khapna thupek a chhuah hnu pawha dan lova Vawk phurh man tur a la awm fo chu pawi a ti a. Champhai District mipuite chu kan himna tura sawrkar thupekte tha taka zawma, tun hnuah hmundang atanga Vawk, vawksa leh vawksa atanga siam reng rengte lalut tawhlo tura hriattirin a ngen nghal a ni.

Vawiin vek hian AH & Vety. Department, Champhai Police leh Environment, Forest & Climate Change Department-te tangkawp chuan sawrkar khapna thupek dinglai zawm lova phurh Vawk note 4 leh a neitu Chinglunnuami (39) D/o Paukhawlang, Bethel Vengte chu Zote kaiah an man bawk. Inrinni kalta September Ni 19, 2020 khan dan lova phurh Vawk note 6 te chu Zote kaiah man a lo ni tawh bawk a ni. Tun dinhmuna Vawk note man 10, la tihral lohte hi AH& Vety. Department chuan an hriselnate endikin a enkawl chhunzawma, Court Case a kal mek a ni.