2825/2023-2024

Khawzawl, 22^nd November 2023: Vawiin khan Khawzawl DC Meeting Hall-ah dan phal loh a ruihhlo leh thil dang tawlh tihtawp a nih theih nan meeting neih a ni a. He hun hi Khawzawl DC Pu K. Lalrohlua chuan kaihruaiin, Khawzawl SP Pu Lalchhuanthanga bakah Khawzawl Maxi Cab Owners Association leh Sumo Counter neitute aiawh an tel. Meeting-ah hian dan phal loha ruihhlo leh thil dang tawlh tihtawp a nih theih nan Sumo Counter-a CCTV vuah chungchang leh thil thawn dan chungchang rel a ni.

Khawzawl DC Pu K. Lalrohlua chuan meeting neih chhan hi sawihfiahin, IGP (Intel) Mizoram Circular no. PHQ/IGP(Int.)/PB/28/ND&PS/Drugs/2022/202 dt 20.09.2023 a tihchhuah chuan Mizoram Maxi Cab/ Sumo Service leh Sumo Counter atanga bungraw thawn leh phurh zingah dan phal loh ruihhlo tawlhruk a awm fo thin tih a tarlang a ni, a ti. He mi tireh tura ruahmanna hrang hrang te a sawi hawn hnuah rorel tan a ni.

Meetingah hian Sumo Counter te chu November ni 27, 2023 (Thawhtanni) atangin thil thawntu leh dawngtu tur te nihna bakah thawnna motor neitu leh khalhtute nihna kimchang tak chu format duan sa hmanga chhinchhiah turin tih an ni a. Sumo/Maxi Cab-a thil thawn tur reng rengin Counter kaltlangin thawn vek tawh tur a ni a, Khawzawl Tuisenphaiah thil thawn te hi a khat tawkin Police ten Sumo Counter te chhinchhiah nen a inmil em tih cross-checking an nei thin ang.

Counter-a CCTV vuah chungchang chu SP Office Khawzawl, Khawzawl Maxi Cab Owners Association leh Counter neitu ten November thla chhung hian dan awmsa leh Counter hmunhma te lo zirchiang se ti a rel a ni.

Khawzawl Sumo Service dan pawh he hunah hian sawiho a ni a, Khawzawl Maxi Cab Owners Association leh Counter neitu ten ruahmanna an siam hi mipui tan pawha tha ber rih ni a hriat a ni a, kalpui zel ni se ti a rel a ni bawk.