4456/2024-2025

Dated Hnahthial, the 27th February, 2025: Nizan dar 9:30 khan Hnahthial District Fishery Development Officer, Pu George Lalnuntluanga leh Leite Branch YMA-te chuan an thu dawn bawhzuiin Mat luia dan phal loh - Bleaching Powder leh Dynamo hmanga Mat Lui hraitu, Zobawk South ami mi pathum te chu an man.

Divisional Forest Officer, Lunglei hnen atanga an thu dawn bawhzuia an mi man te hi Zobawk South mi leh sa ni a insawi Thanpuia, R. Vanlalhmuaka fapa; Lalnunsiama, Lalbeiseia fapa leh Lalrinfela, R. Lalhmingchhuana fapa te an ni a. DFDO leh YMA te chuan a hmunah nangchingin an ni hnen aṭang hian Sangha an man sa leh an hmanrua te chu an man sak a. Phalna nei lova luia nungcha man hi jail tan theihna a nih bakah pawisa chawi theihna a nih thu hrilhfiahin vawiin khan District Fisheries Development Officer, Hnahthial hmaa inlan tura hrilhin haw tir nghal an ni.

Pu George Lalnuntluanga, DFDO chuan Mizoram Sawrkar in kan ram luidung nungcha te an chereu nasat tawh em avangin nasa taka humhalh hna thawh mêk zel a nih thu a sawi a. YMA-te kutke berah hmangin ngawrh taka humhalh hna hi kalpui mek a nih thu leh mipui te chu dan phalloh hmanga kan ram luidung nungchate sawisa lo tur a ngen a. Lui kal thinte chu Fisheries Department hnen aṭanga License siamtir tura hriattir nawn leh in License tel lo hian khawi laiah mah luia nungcha man, tihbuai leh thah hi dan in a phal loh thu a sawi a ni.