DIRECTORATE OF INFORMATION & PUBLIC RELATIONS, Government of Mizoram, India

4457/2024-2025

Lunglei, 2025 Ramtuk thla ni 27: Vawiin khan Lunglei District Level Coordination Committee for Implementation of National Social Assistance Programme (NSAP) chu Additional Deputy Commissioner Pi Rochuangkimi Khenglawt kaihhruaiin a office chamber-ah an ṭhu khawm a, kum 2023-2024 chhung atana Lunglei District-a National Family Benefit Scheme (NFBS) hnuaia hamṭhatna dawngtu tur an thlang.

He hunah hian Lunglei District Social Welfare & Tribal Affairs Officer Pu C. L. Joseph chuan National Family Benefit Scheme hnuaiah hian chhungkaw chawmtu ber an thihin, an chhungte hnenah ṭanpuina (one time assistance) ₹ 20,000/- pek ṭhin a nih thu a sawi a. Tun ṭumah hian Lunglei District-ah mi 92-in dilna an theh lut a, chuta ṭang chuan ṭanpuina dawng turin mi 30 thlan an ni.

He ṭhut khawmah hian committee member-te - Lunglei DRDO Project Director Pi ST Lalvensangi, Lunglei Sub-Headquarters YMA ai awh Pu K. Vanlalhruaia leh Lunglei Sub-Headquarters MHIP ai awh Pi Vanlalpianpuii te an tel a ni.

Attachment