4458/2024-2025

AIZAWL; the 27^th February, 2025: Vawiin chawhnu dar 1:00 khan Transport Minister Pu Vanlalhlana chuan Department 17 te hnenah Lirthei thar 27 a hlan. Voluntary Vehicle Modernization Policy (V-VMP), Vehicle Scrapping Policy (VSP) ti pawha hriat hi (SASCI Part-II) hi Ministry of Road Transport and Highways (MoRTH) in lirthei hlui tawh te hluihlawna, a thar a thlak tura lirthei neitute tana ruahmanna a siam.

Vawiin lirthei hlanna programme hi Transport Secretary Pu Zosangliana’n kaihruaiin, Er. R.Lalrammawia’n technical report a pek zawhah Hon’ble Transport Minister Pu Vanlalhlana chuan Department 17 aiawha lo kalte hnenah lirthei Document pawimawh a hlan hlawm a ni. He hunah hian thu sawiin, Minister chuan vawiin programme hi Transport Department tana rahbi pawimawh tak a ni a. Voluntary Vehicle Modernization  Policy( V-VMP) sawrkar Department  17 tan lirthei thar 27 lai mai kan semchhuak tur hi lawmawm ka ti a. Vawiina kan motor semchhuah te hi SASCI sum hmanga lei a ni a, Transport department chuan he incentive hi mahni department bil atan hmang mai lovin, GAD nen tangkawpin tun ang hun duhawm hi kan lo thleng ta a ni. Transport Department-a officer leh staff zawng zawngte chungah a bikin lawmthu ka sawi a ni.

He programme kan hman mek hi a background leh sawrkar hmachhawp thenkhatte tarlan nan ka hmang duh a. Tunlaiah khawvelin climate change tih te, sustainable development tih te a buaipui em em a. Sustainable Development Goals phei chu sawrkar inrelbawlna hrang hrangah a taka kan kalpui a lo ngai ve ta a ni.

Petrol kan lak changa pump-a kan hmuh fo tur chu blended ethanol in tar hi a ni. Ethanol blended program hi kum 2018 khan central chuan a kalpui tan a. November 2022-a 10% ethanol blended petrol achieve a tum chu tum aia hma thla 5 ngawtin a hlawhtlinpui tak si ah chuan, 20% blended ethanol target, kum 2030-a achieve a tum pawh chu kum 2025-26 chhunga hlawhtlinpui turin a sawn hma ta hial a ni.

Chutiang zelin motor enkawl chhunzawm tlak loh hluihlawn mai turte mumal zawka scrapping kalpui turin vehicle scrapping policy a duang a. Hei hian motor part hlui – thir a ni emaw, rubber, darthlalang te a ni emaw motor part dang dang te mumal zawka recycle dan tur a duang a. Hei hian kan leilung hausakna laih chhuah kawngah sum tam tak save a rin bakah, thui takin environment a venhim a ring a. Mi tam tak tan eizawnna a pek a beisei bawk.

Transport Department pawhin Hlimena kan ramah sawn Registered Vehicle Scrapping Facility (RVSF) din turin hma a la mek a. Nakin lawkah chuan lirthei kum 15 aia upa hman tlak tawh loha ngaihte chu he scrapping facility-ah hian recycle a ni tawh ang.

India ram hi khawvela road accident tamna ber leh accident vanga nunna chan an tamna ber a ni a. Mizoramah ngei pawn kumin sawrkar kum kal lai mek February ni 19 thleng khan, accident hi tum 85 awm tawhin, mi 42 laiin nunna an chan tawh a ni. Chutiang a nih avang chuan India sawrkar hian lirthei hmangtute himna a ngaipawimawh em em a.

Motor him zawng tehna Bharat New Car Assessment Program (Bharat NCAP) pawh August 2023 khan a hmang tan a. He safety standard thar hmang hian motor chhuak thar te chu crash test an ni ang a. An him dan azirin star rating pek an ni ang. Hei hian lirthei siam chhuak tute thui takin motor himna a ngaihven tir dawn a ni.

Passenger phur lirtheia panic button vuah te, vehicle location tracking device te hi Ministry of Road Transport and Highways (MoRTH) hmalakna vek a ni a. Hemi chungchangah hian keipawn kumin January thlaa Delhi-a kan meeting khan a khawl lei nan Union Minister hnenah Ministry-in zaa sawnga (50%) tal a tum sak thei lawmni tiin ka ngen nghe nghe a ni.

Tin, lirthei kum 15 aia upa tana RC leh Fitness Certificate renew turin tehfung a rawn siam khirh em em a. Kum 15 chin chunglam phei chu certificate renew man hi a to talh tawh a ni. Nakin lawkah chuan Automated Testing Station-ah kher lirthei test a tul tawh dawn a. Lirthei kum 15 aia upa, siam thatna chance pek hnua fitness test paltlang zo lo chu End of Life Vehicle (ELV)-a puan a ngai ang a, scrapping facility-ah recycle tura dah a ngai tawh ang.

Kan hriat angin MoRTH hian hma a la chak in thil thar a rawn introduce zung zung a, India rama State-te hian an speed hi kan pha lo hle a. Chuti chung chuan Mizoram hi a titha pawlah kan la lang pha ve zel a ni.

A tawp nana kan sawi duh chu hetiang hi Transport huanga hmalakna awm thenkhatte a ni a. Sawrkar laipui chuan mipui him zawk nan leh kan environment a him zawk nan tiin thil a duh khirh telh telh si a. India rama kan awm chhung chuan kawng tam takah State sawrkar pawhin kan zawm ve a ngai dawn a. Kan sawrkar pawhin lirthei hmanga eizawngtute harsatna a hre reng a. Chutih rual chuan lirthei hmangtute tana na lo tura ruahmanna a siam pawh a ngai fo thin a ni.

Sawrkar laipui a ni emaw State sawrkar a ni emaw, dan kan siam te hi ngun taka ngaihtuah a nih hnua kan vaia that tlan nana siam a ni tih hre thar i la. Sawrkarin dan a duan sa tha taka kan zawm hian khua leh tui tha kan lo ni dawn a ni, a ti.

Technical report pein Er.R.Lalrammawia chuan  he V-VMP in a tum chu Air Polution tih tlem, kan Environment te tih thianghlim, Lirthei hlui tawh lutuk avanga chetsualna thleng thin te tihtlem bakah fuel efficiency tih san a, maintenance cost tihtlem a ni. Automotive, Steel leh Electronic Industry te tan Recycle hmanga man tlawm zawkin Raw material tihtam leh mi tam tak tan eizawnna siam a ni, a ti.

He VSP hian commercial and passenger vehicles fit tawh lo te mahni thu a hluihlawn tir te, sawrkar Lirthei kum 15 aia upa tawh chu registration tih thih vek(De-Registration), (Private leh sawrkar Lirthei Kum 15 la ting lo pawh Automated Testing Stations (ATSs) in fit lo a tih chuan a huam vek ang) leh Private Lirthei kum 20 tling tawh Registration tih thih vek te a ni. Chuvangin Department tin te khan RVSFs peihfel hma chuan kan Lirthei Kum 15 tling tawh chu Normal Condemnation lo ti vek turin ka ngen duh che u a ni, a ti.

He policy hian heng hamthatna te hi a keng dawn a ni: non-transport vehicles ah Tax 25% discount a ni ang a, transport vehicles ah Tax 15% discount a ni ang. Registration fee a thlawn ang a, Lirthei siamtu company ten Lirthei thar an lei hunah Discount a pe bawk ang.

MoRTH hian V-VMP kalpui nan hian milestone hrang hrang a siam a. Mile stone pakhat tihhlawhtlin hian incentive cheng vaibelchhe 3 a pe a. Mizoramin Mile stone pakhatna kan achieve avangin incentive kan dawng ve a ni. Heng Lirthei 27 hi Government e-Marketplace (GeM) atanga lei vek a ni a, lei nan hian cheng vaibelchhe 2.8 sen a ni.  Registration, Smart card leh thil dang pawimawh te siam nan leh Lirthei tina Petrol Litre 5 theuh an inkhalh chhuah nan thun a ni bawk, tichuan a vaia sum sen chu cheng vaibelchhia 2.84 a ni. He V-VMP hnuaiah hian Mizoram Sawrkar hnuaia Lirthei 93 Scrap a ni.

Minister hian programme hman zawhah heng Lirthei 27 ten an Department theuh an pan tur chu a vailiam nghal a ni.