Vawiin khan Champhai District Agriculture Officer Pu George Lalthanngura leh MJA Champhai District member-te chuan tunhnaia  thlai eichhetu pangang chi khat,  Fall Army Worm (FAW) in Leisenzo leh Sesih khaw thlawhhma a thlai a tih chhiat dan an enfiah.

Vawiin fehchhuahnaah hian Leisenzo Chhungkaw 150 chuangin thlawhhma a an neih mekna hmun "Khuaitlang Zau" a  Vaimim leh thlai dang  Pangangin a ei chhiat mekte chu tlawh a ni a.  Loneitute hnenah Champhai District Agriculture Department a mithiamte chuan thlawhhma a pangang puang mek suat dan leh a pung zel tur danna kawng a hmalak dan tur zirtirna an neih bakah uluk taka zirtirna an pek hnuah pangang thahna hlo an sem nghal bawk.

Vawiin a District Agriculture Department Staff te leh MJA ten thlawhhma an fankual atang hian thlai chi thlak hmasak leh thangduang ber Vaimim chu pangang hian bawm hmasak berah neiin,  chhungtin thlawhhma a Vaimim chu an eichhiat sak mek tih hmuh chhuah a ni a.  Heng pangang hian  thlai chin zinga thlai chi 80 velah chet a thawh thin tih hmuh chhuah niin,  an thlai eichhiatah hian pangang tui engemawzat hmuh chhuah tel anih vangin thlai dang lo thanglian turah pawh pakai a; an eichhiat zel dawn avangin theih tawp chhuah a pangang leh a tui that a; tih chimih a ngai dawn tih hmuh chhuah a ni.  

Champhai District chhung khaw 17 a chhung kaw 590 zet thlawhhma pangangin a eichhiat mek beihpui thlakna kal mekah District Agriculture Circle tina mawhphurtute chuan pangang chetna thlawhhma nei khuate riahchilhin,  loneitute hnena rannung thahna hlo an pek bakah hlo hmang kher lova pangang tihhlum theihna kawng hrang hrangte zirtirna pein thlawhhma an vilpui zuipui nghal bawk.

Vawiin a FOCUS lam mithiamten loneitute zirtina an pek danin thlai eichhetu pangang chi thlahtu Phengphehlep hi ni 10-20 vel damin,  zankhatah km 100 zet a thlawh hman vang leh a damchhungin tui 1500 vel a neih theih avangin an inthlah pung chak hle a. Pangang hi hunreilote chhunga a puitlin theih bakah buhchi-umin phengphehlepah bawk a chan leh theih avangin heng rannung hnawksak tak hian kumin hian kuthnathawktute thlai/buhbal thar chhuah tur a eichhiat vek theih dawn avangin MJA Champhai District chuan thlai eichhetu pangang leh a thlahtu Phengphehlep suatmang tura rampum huapa beihpui thlak a ngai takzet niin a hria a ni.