Vawiin khan Information & Public Relations Director Pu David L.Thangliana’n Lynchpin leh Zalen chanchinbu ten zirna chungchanga kumtin an buatsaih thin Education Fair – 17th Edu-Options 2019 chu Dawrpui Multipurpose Centre ah a hawng a, vawiin leh naktuk a awh dawn a ni.

Pu David L.Thangliana chuan zirlai te tan, zirna chungchang leh an kal zelna kawnga pui thei tur Edu Options buatsaih a ni thin chu lawmawm tiin zirlai leh nu leh pate tan thil tangkai leh hlu tak nia a hriat thu a sawi a. Subject hrang hrang te a tam tawh avangin, eizawnna kawng tha pawh a in hawng chho zel a, sawrkar hna thawh ringawt tum lova heng zirna hrang hrang, nakina eizawnna kawng tha ni thei hi kan zirlai leh an nu leh pate’n an hriat leh an chik hi thil tha tak a ni a, chumi atan Edu Options hi thil tangkai tak a ni thei a ni, a ti.

Mizoram hmasawnna kal zelah tun hmaa miin eizawnna tlaka an ngaih loh hna tam tak chu tunah eizawnna tha tak a ni a, hun inthlak zelah zirna lamah pawh miin duhthlanna ‘options’ tun hma aiin an nei tam tawh a, mahni tuina lampang zir leh buaipui hi a finthlakin a hlawkthlak zawk a ni, a ti. Mahni kawtkaia ramchhung zirna in tha tak tak ten direct career counselling  leh admission hial pawh an rawn ruahman hi Mizo zirlai leh an nu leh paten chhawr tangkai thei ngei se a duh thu a sawi bawk. 

Zalen Editor Pu Vanlalrema Vantawl chuan zirna chu investment a nih tawh thu sawiin nu leh paten chutiang turin kan fate tan, an zirna tur kan puahchah leh kan thlanpui thiam a ngai tih a sawi a. Edu Options kaltlangin mahni budget milin zirna tha leh nakina eizawnna tling ni thei chungchang an hre zau thei a, heng zirna in lokal te hian placement pawh an nei tha thawkhat a ni, a ti. 

17th Edu-Options 2019 ah hian ram chhung hmun hrang hrang atanga zirna in a kaihhnawih 22 an tel a, 35 bawr beisei a ni a mahse 13 hian flight an hmuh theih loh vangin an lo tel thei ta lo a ni.