Kolasib District huam chhunga Mipui mimir nitin mamawh bungrua/thil heng petrol,Diesel, Khawnvartui, Buhfai leh LPG khawih chingpen thin tihtawp dan tur ngaituahin vawiin khan Kolasib Bawrhsap Pisa pindan ah inkawmhona neih a ni.

Bawrhsap Pu Zoengsanga chuan National Highway 54 kaltlanga Assam atanga Mizoram a rawn lut mipui mimir mamawh khawih chingpen fo thin ani chu thil thalo tak leh veiawm tak mipui te chanvo tur eiruk sakna chikhat a nih thu tarlangin Kolasib District chu Mizoram luhka anih angin helai hmuna khawih chingpen thin a nih hian Mizoram puma mipuiten an tuar veka chuvangin heng Petrol, Diesel, Khawnvartui, Buhfai leh LPG khawih chingpen thin titawp tur hian khawtlang hruaitute nen tih takzeta thawhho a tul thu a sawi bawk.

Inkawmhona kaihruaitu Bawrhsap Pu Zoengsanga chuan meeting neih chhan sawiin Assam atanga mizoramin  eirawngbawlna Gas leh tuialhthei kan chawk luhte kawng laka tihchinpen a nih thin thu leh thuneitu sang zawk atangin Kolasib District chhung NH -54 kawngdungah hetiang tih chinpennna hmun pariat (8) lai a awm thu hriattirna an dawn thu a tarlang a, Mizoram mipui ten Gas buktling leh Oil pawlhdal loh kan dawn theih nan hetianga Eirawngbawl gas leh tuialhthei  tihchinpen awm thin te tih tawp dan tur leh tihchinpenna hmun zawn chhuah a, tih tawp a nih theih nana hmalak dan tur ngaihtuah a tul thu a sawi a ni.

Hetianga dan bawhchhiatna awm thin tihtawp anih theih nan hmalatu tur SP Kolasib kaihhruaina hnuaiah Essential Commodities Protection Squad din nghal a ni a. He Squad ah hian SDO(S), Addl SP Kolasib, DIPRO, Inspector Legal Metrology, Sub Hqrs YMA aiawh mi pahnih leh Kolasib District MJA President te chu Member a ruat an ni a, Sub Division level a Squad te thawhpui tur hian Police Squad 1 kawnpui, Awithangpa Group YMA President leh Secretary bakah Police Squad 2 Vairengte leh Serlui Group YMA President leh Secretary te ruat bawk an ni.
Inkawmhona ah hian chak taka hmalak nghal nise tih a ni a, Gas buk tling lo, khawnvartui leh tuialhthei pawlh daltu man an awm anih chuan an lak ah FIR thehluh thin nise tih a ni a, Gas lak hma a buk thlap turin Branch tin YMA leh VC hruaitute hnenah ngenna siam nise, Kolasib District chhunga Gas leh oil khawih chingpenna thin te a rang thei ang bera zawnchhuah, Essential Commodities Act 1955 Control Order ina a phal chin bak Gas bur nei te zawnchhuah leh mansak bakah retailer te buhfai semchhuah pawh uluk leh ngun zawka vil tur chungchang te rel ani. Hmala tu tura din Squad ten an hmalakna chu thlakhat hnu ah hmalakna te thlir ho leh nise tih rel bawk a ni.

Inkawmhona ah hian Sawrkar Official hrang hrang te bak ah Sub Hqrs YMA leh MJA Kolasib hruaitute an tel a ni.