Aizawl Civil Hospital bul a Dawrpui Multi-Purpose Centre tur chu sak tan thuai tum a ni. Pu Lalsawta, Law Minister leh bialtu MLA ni bawk, Pu Zodintluanga, Minister UD & PA leh Pu Lal Thanzara, Minister of State, PWD te chuan tukin khan helai hmun hi tlawhin bul tan dan tur PWD hotute, Health & Family Welfare hotute leh Dawrpui khawtlang hruaitute nen an sawiho.

Civil Hospital Aizawl bula Quarters awmna hmun hi Sawrkar chuan Dawrpui Multi Purpose Centre sakna atan a lo pe tawh tih bialtu MLA leh Minister Pu Lalsawta chuan sawiin, "Mi thenkhat ten an sawibuai hnuah Dawrpui Veng hian kan mamawh tlang tiin kan pelet thei tia an sawi hnuah, an pelet a, an pek chin hi Revenue Department lamin an then dawn a ni," tiin a sawi. Pu Lalsawta chuan, "Keini hian helai hmunah hian Multi Level Parking kan sa ve dawn a, Trauma Centre sak a ni dawn bawka chu chu kan en chhan ber chu a ni," a ti a. Health Department lamin Trauma Centre an sakna tur chin chu Engineer te pawhin an enfiah vek tawh tih sawiin, Dawrpui in ram an sahthlak tur chin chu ngaihtuah mek a nih thu a sawi a, Health ho mamawh ang hi sahthlak a ni leh dawna a hmun hian a la zo vek niin a sawi.

Bialtu MLA chuan helai hmuna sawkarin hmalak a tumnaah hian an hmanhmawh avangin chak takin hma an la tih a sawi a, quarters la awm mekte luahtute pawhin kumin April thla hi chuan an awmna hmun an chhuahsan ngei a rin thu a sawi. Sawrkar ruahmanna ang chuan building thar sak a nih hnuah duty awmna tur an ruahman nghal thu a sawi bawk a ni.

Dawrpui Multi-Purpose Centre ah hian mipui hman tur Hall lian tham tak Civil Hospital ah chhiat tawh thulh a hmun remchang tur buatsaih te Green Park leh motor park na hmun tur ruahman a ni. He hun sa tur hian DoNER atangin sum hmuh tawh niin a satu tur pawh thlan fel a ni tawh a. Civil Hospital quarters luahtute hi April 30, 2015 hma in quarters hi chhuahsan tura beisei an niin In ding lai te chu PWD in a thiah leh auction hna an thawk nghal ang.