Chief Minister Pu Lal Thanhawla chuan vawiin khan Chhingchhip Mualpui khelmualah Joseph Thangbuta and Genevieve Roziki Memorial Football Tournament Running Trophy final khelh a telpui a, final hi JT & GR Memorial Football Club leh Thantluangi Memorial Football Club ten an khel a ni.

Chief Minister chuan sawrkarin thalaite tan khawvel thar kawng hrang hrangah a siam chho mek zel a ni tiin, infiamna ah te, zirna lamah te, hnathawh tur zawnna kawngah te, thiamna bik chherchhuahna kawnga training pek thu ah te hma a la chho mek a ni, a ti a. Tun kum thum chhung vel khan sipai ah sang tel thun luh an nih thu leh tunhnai maiah pawh 100 tel thun luh an ni a ti a. Infiamna lamah a hmunhma neih hmasak a tul a ni tiin a hmanrua, a zirtirtute ngaihtuah chhoh zel a ni a ti. Thalaite tana khawvel thar sawrkarin a siamna ah ruihhlo in hmun a chang thei lova, ruihhlo, zuk leh hmuam te hi setan an mihringte a beihna ber a ni a, chuvang hetiang lakah kan fihlim a pawimawh a ni a ti.

Chief Minister chuan hmasawnna reng reng hi a in tahtawl a kalpui a ngai thin a ni a ti a, vawi leh khatah a tih vek theih thin loh a ni a ti. Mizote hi hnam changkang leh ropui ni tur hian ei leh barah leh sum leh paiah kan intodelh a tul hmasa a ni tiin, chumi tur chuan mite ber ten lei rem an rah a, khaw eng an hmuh phawt a tul a, chumi atan chuan sawrkarin NLUP a kalpui mek a ni, a ti. Hlawhtlinna pawh kan hmu chho mek zel a ni a ti.

Chief Minister chuan infiamna hi hriselna tha min siamtu a nih avangin thalaite tan a pawimawh bik a ni a ti a. Final khel turte chu infiammi rilru dik tak sportsman spirit nei chunga inkhel tur leh pawn lamah pawh sportsman spirit hi mahni nun theuh kaihruaitu ah hmang turin a chah a. Inkhel chu a entute hmuhnawm tih tur zawnga khel turin leh chin dan thalo, inkhelh laia field chhunga nat der leh tluk derte tilo turin a chah bawk a ni.

Chief Minister tawiawmtu Pu John Siamkunga, MLA & Chairman, Mizoram Law Commission chuan a pa Joseph Thangbuta leh a nu Genevieve Roziki te hriatrengna football tournament final Chief Minister te nupa in an hmanpui theih avang leh khawtlangin an hlutsak avangin lawmthu a sawi a.

Bialtu MLA (Tuikum Bial) Er. Lalrinawma pawhin thu sawiin a bial huapa football tournament buatsaih a football final khelh Chief Minister ngeiin a hmanpui chu lawmthu sawiin a bial chhung hmunhma te a rawn hmuhpui chu lawmthu a sawi bawk a ni.

JT & GR Memorial Football Tournament hi Tuikum bial chhung tana buatsaih a ni a, team lut zawng zawng 12 zingah tualchhung team 7 an tel a ni.

Inkhelh hma inkhawm tawi buatsaih chu Pu Varnghinglova, VCP & Chairman, Organising Committee in a kaihruai a ni.