Aizawl khawpui hmun laili taka Dawrpui Multipurpose Centre sakna tur hmalakna kal zelah vawiin khan Sports Minister Pu Zodintluanga leh Education Minister Pu Lalsawta, bialtu MLA ni bawk hovin inrawnkhawmna hun Sports Minister office-ah neih a ni a, PWD hotu te, tlawmngai pawl hrang hrang intelkhawmna Dawrpui Multipurpose Centre Demand Committee hruaitute an tel a ni.

Tarlan tawh thin angin helai hmuna Multipurpose Centre din tura hmalak mek chu a huam zau thei ber leh sorkar leh mipui mimir chhawr tangkai theih ber dan tura duan niin hmalak belhna tur pawh chhawpchhuah thar zel a ni a. He hmun buatsaihna tura sum mamawh te chu DoNER Ministry in a tumsak tur niin a sa tur thlanna pawh hun hnaivai takah neih theih beisei a nih thu te, helai hmunah hian ruang chhuak tur sawngbawlna hmun tha tak te, mipui vantlang intawhkhawmna tur Auditorium, Basketball Court bakah lirthei dahkhawmna hmun tur buatsaih tum a nih thu te vawiin meeting-ah hian sawilan niin Chief Minister pawhin a tuipui thu leh ama ho ngeia kutthlak tan a beiseiawm thu te huamzau takin an sawi ho a ni.