Nimin khan Health Minister Pu Lal Thanzara khaihhruaiin Dawrpui Multipurpose Centre ram sahthlak chungchang leh mipui tan hman tangkai a nih theih dan tur sawihona Aijal Club-ah sawm bikte nen hun hman a ni a. He hun hi Finance Minister Pu Lalsawta leh UD&PA Minister Pu Zodintluanga'n an hmanpui bawk.
Nimin sawihona hunah hian Health Department Principal Secretary Pu R.L Rinawma, Health Services Principal Director Dr. K. Ropari leh officer dangte, MZU leh PUC a professor senior-te, YMA, MHIP, MJA, MZP, MSU, PRISM leh tlawmngai pawl dang aiawhte leh Dawrpui Multipurpose Centre Committee aiawh te an tel ni.
Sorkarin Aizawl Civil Hospital ram Dawrpui Multipurpose Centre Committee hnena a lo sahthlak tawh chu Damdawi In mamawhna nasa tak thlirin engemawzat sahthlak let leh remtih a ni a. Nimin khan Health Department, Dawrpui Multipurpose Centre leh mipui ten helai ram hi tangkai taka an hman tlan theih dan tur zau taka sawihona leh inrawntawnna hun hman a ni.
