Disaster Management & Rehabilitation Department buatsaihin vawiin khan Lunglei DC’s Conference Hall-ah ‘One Day Workshop on Incident Response System (IRS) & India Disaster Resource Network (IRDN)’ neih a ni a, DM&R Principal Secretary Pu P.C. Lallawmsanga, IPS leh Lunglei DC Pu Ashish Madhaorao More, IAS ten an hmanpui a ni.

Disaster management Workshop Lunglei DC Pu Ashish More kaihhruaihah DM&R Principal Secretary chuan chhiatrupna lo thleng theih laka inven chungchang hi ngaihven leh ngaihsak hlawh lo thin em em a ni a, thil pawi a thlen zawh vek tawh hnuah kan harhchhuak chauh thin hi a pawi hle a ni, a ti a. Chhiatrupna hi englai pawha thleng thei a nih avangin mitinte lo inring a, hmachhawn dan tur inzirtir a pawimawh tak zet a ni, a ti. Chhiatrupna hmachhawn dan tur inhrilhhriat leh inzirtir hian a nghawng a ti tlem thei mai bakah nundan pangngai kan awh leh theihna turin thui takin mipuite min tanpui thei a ni, a ti bawk. A bik takin sorkar officials leh department te mawhphurhna a sang hle avangin kan intuaihriam a tul a; tlawmngai pawlte nena thawhho thiam pawh a tul hle a ni, a ti. Mizoram-ah hian nitin 2-4 Reichter Scale-a lirnghing/leihnuai che a awm reng a ni tih mithiamten an chhinchhiah reng a, mipui mimirin hre thei lo mahila hun reiah eng ang tak nge nghawng a la nei dawn tih kan hre lova, chuvangin mitin hi inring renga, chhitarupna thlen pawha hmachhawn dan tur kan hriat theuh a ngai a ni, a ti.

Workshop hawngtu Lunglei DC Pu Ashish More pawhin thu sawiin Mizoram chu tlangram a nih mai bakah inkalpawh leh inbiakpawh zung zung theih lohna hmun kilkhawr deuha awm a ni, chuvangin mitin ten chhiatrupna thleng thei lakah inven leh hmachhawn dan tur kan hriat theuh a tul a ni, a ti. Mihring finmkur loh vanga kangmei chhuak thin te ang hi chu tihrem theih a ni a, khuarel chhiatna thleng thin erawh chu mihringte tan dan rual a ni lo, a ti a. Sorkar laipui pawhin rampuma hman tur disaster management guidelines zawm tur a duang tawh a, state tinah Disaster Management Committee din tura hriattir an ni theuh bawk a. Mizorama kan khawpui leh khuate pawh ruahmanna felfai awm lova thang chho an nih avangin chhiatrupna laka inven leh hmachhawn dan tur hi kan thiam vek a tul a ni, a ti.

‘One Day Workshop on IRS & IDRN’-ah hian DM&R Joint Director Pu Lalhmunsanga leh District Organiser (Aizawl) Robert Zothansanga Hmar ten Lunglei District officials leh Department aiawh kalte chu zirtirna an pe a ni.

Attachment

  • Loading attachment...