3022/2023-2024

Aizawl, 13. 12. 2023: State Election Commission, Mizoram thupek angin Aizawl District huam chhungah Dawrpui Vengthar Local Council Electoral Rolls Summary Revision, 2023 neih a ni a. Aizawl District Addl. DC Pu Isaac C. Lalrempuia chuan vawiin khan Final Electoral Rolls hi Aizawl DC Conference Hall ah tlangzarh in, political party aiawh te hnenah a hlan a ni.

Addl. DC chuan Summary Revision of Dawrpui Vengthar Local Council Electoral Rolls, 2023 tluang tak leh hlawhtling taka neih theih chhan bialtu MERO, AMERO leh LLO te, Local Council, Political Party te, tlawmngai pawl hrang hrangte leh media te tawiawmna leh finchhuahna vang a nih thu sawiin an chungah lawmthu a sawi a ni.

Aizawl District huam chhunga Dawrpui Vengthar Electoral Rolls siam thatna chu 01.10.2023 a kum tling chhutin siam a ni a. Roll chu ni 16.11.2023 khan mipui te en theih tura tarchhuah a ni a. Hemi ni atang hian 24.11.2023 thleng Electoral Roll atanga paih, thun thar, siamthat ngai leh insawn duhte tan dilna (claims and objections) LLO hnenah thehluhna hun hawn a ni.

Ni 16.11.2023 atanga 24.11.2023 chhunga dilna lut chu 25.11.2023 atanga ni 12.12.2023 chhungin MERO/AMERO ten an endik a. Hetianga an enfiah zawh hnu hian MERO thutlukna a siam fel hnuah hming thunluh ngai, paih ngai leh siamthat ngaite chu Election Branch-in a thliar hrang leh a, hemi hnu hian Data entry (Computer-a thunluh hna) thawh zui nghal char char a ni.

State Election Commission, Mizoram in ruahmanna a siam angin, mi tupawh Final Electoral Rolls lei duh tan a soft copy (thlalak tello) Rs. 100/- in leh a hard copy phek 1 Rs. 5/- zelin lei theih a ni. Amaherawhchu hard copy lei duhte chuan sawi lawk hmasak tur a ni a. A phek duh lai chauh lei theih a ni lo.

Tun tum Final Local Council Electoral Rolls-a Elector awmzat a vaiin 3052 a ni a. Local Council huamchhungah hian Polling Station pali awmin, Dawrpui Vengthar-I P/S ah hian draft roll ah mi 848 awmin, ennawn hnu ah mi 1013 an pung a. Dawrpui Vengthar-II P/S draft roll a mi 642 awm chu ennawn hnu ah mi 633 a ni a. Dawrpui Vengthar-III P/S draft roll a mi 802 awm chu roll ennawn hnu ah 806 niin, Dawrpui Vengthar-IV pawh draft roll a mi 735 awm chu final revision ah 600 a ni.

Vawiin Local Council Roll tlangzarhna hian MERO Pi Lalduhzuali, SDO, DIPRO leh BLO te bakah political party aiawhte an tel a ni.