3599/2022-2023
Champhai, the 15th February, 2023: Deen Dayal Antyodaya Yojana - National Urban Livelihood Mission (DAY-NULM) hnuaia khawpui chhunga chenna/innghahna mumal nei lote tana hmalakna, Shelter for Urban Homeless (SUH) kaltlanga hmalaknate viltu City Level Executive Committee, Champhai chuan an Chairman Pu James Lalrinchhana, District Bawrhsap hovin vawiin chawhnu dar 3 khan New Champhaia kum upate tlukluhna leh enkawlna In, Shelter for Senior Citizens sak mek chu an tlawh.

District Bawrhsap Pu James Lalrinchhana chuan District hmasawn nana hmasawnna ruhrel siam pawimawh tak takte a puitlin theih nana ngaihven a tul thu sawiin, ngaihtuahna fim tak seng chunga enzui a tul a ni, a ti a. Hna tha leh tlo, ram leh hnam tana rotling, mipuite tana chhawrnahawm tak din a nih theih nan hnathawh kal lai mekte enfiah thin a tul thu a sawi a. Tun hun mai nilo, nakin thlenga awm zel dan tur leh enkawl zui dan turte ngaihtuah tel a pawimawh thu a sawi a. Kum upate hmakhua ngaiin Sawrkarin theihtawp chhuaha hma a lak thin thu sawiin, kum upate tlukluhna leh enkawlna tur satute chu neitu thinlung pua theihtawp chhuah turin a chah a ni.

Kum upate tlukluhna leh enkawlna hmun Shelter for Senior Citizens, New Champhaia sak mek hi Rs 35,32,000 senna tur niin, June ni 2, 2022 khan sak tan a ni a. First installment Rs 1,76,600 leh second installment Rs 14,12,800 pek chhuah tawh niin, tunah hian third installment Rs 14,12,800 dil mek a ni a, hemi hnu hian fourth installment Rs 5,29,800 dil leh tur a ni ang.

Hemi hnu hian Bawrhsap Pu James Lalrinchhana chuan New Champhaia Genesaret Gospel Home for Senior Citizens leh Genesaret Gospel Home for Children's Home-te pawh a tlawh nghal a. Genesaret Gospel Home Board Member ten an lo dawngsawng a; thawktute leh Home-a awmte kawmna hun a hmang a ni.

He hunah hian City Level Executive Committee Member Secretary Pi R.Lalnunkimi, DUDO Champhai leh Member dangte an tel a ni.