Vawiin chawhnu dar 1 khan Aizawl District, Deputy Commissioner Dr. Franklin Laltinkhuma chuan, ama office chamber ah Mizo tlangval huaisen 3 te hnenah chawimawina sum a hlan.

Sarvottam Jeevan Raksha Padak chu kum 16 a upa C. Lalduhawma (L) Bethlehem Vengthlang (Sikul Veng) chhungte hnenah Rs. 1,00,000/- (Cheng nuai khat) hlan a ni. Ani hian ni 2.4.2011 khan Bethlehem Vengthlang - World Bank Road Tantia Construction Ltd in Chite Bridge an dawh tur bankhur 26 ft a zau leh 20 ft a thuk a naupang P.C. Laltlanhlua kum 11 tla chu tui chen pawh thiam lovin chhan turin tui ah a zuang thla ve nghal a, naupang chu chhan theiin amah thung erawh in a nun a chan ta hlauh a ni.

Lalremmawia Sailo s/o Chhuanvawra (L) Saitual leh Martin Lalthanmawia s/o K. Lalchhuanga, Keifang khua te hnenah Jeevan Raksha Padak hlan a ni bawk a, hei hian tangkafai Rs. 40,000/- (Cheng singli) a keng tel a ni.

Anni pahnih hi ni 27.11.2009 khan Guwahati atanga Aizawl kal bus ah an chuang a, passenger te ngenna angin bus hi Silchar khaw daiah dingin an inthiar hlawm a, hetih lai hian ngunhnam leh chemte keng misual 10 rualin an rawn hual thut a, anni pahnih hian huaisen taka an lo beih letna avangin passenger 21 te chu him takin an kal thei a, anni pahnih erawh chu damdawiin lamah enkawl an ngai ta a ni.

Ministry of Home Affairs, Govt. of India, New Delhi atanga huaisen lawmman hi lokal niin, vawiin chuan a tangka fai chauh hlan an ni a. India Independence Day 15 August, 2012 ah Medal chu hlan an ni dawn a ni.