Nimina Kolasib DC Pu H. Lalengmawia IAS leh Kolasib a Head of Office te meeting-a Kolasib District huam chhunga ziak leh chhiar thiam lo te tan Literacy Drive kalpui dan chungchang an sawiho bawhzuiin vawiin khan hemi chungchang hi DC hovin DEO, SDEO, SSA leh RMSA hotu leh aiawhte chuan DC Office Chamber-ah sawihoin meeting an nei a. Meeting ah hian District chhunga ziak leh chhiar thiam lo awmzat chhinchhiah leh hriat an nih theih nan survey neih nise tih rel a ni a. Survey hi DEO Office in buaipui se, an hmuh dan report kimchang chu January 2016 thla tawp lamah thehluh nise tih rel a ni bawk a. Report kimchang thehluh hnu hian Literacy Drive kalpui dan tur la duan leh tur a ni ang.

Nimina DC hova meeting neiha ran khuahkhirh chungchanga hma lak dan tur sawiho turin DC hovin Kolasib khaw chhunga VC zawng zawng te, MHIP leh YMA aiawh te chuan naktuk dar 11:00 AM khian DC Office ah meeting an nei dawn.