Nimin 17.11.2015 khan DC Conference Hall-ah Kolasib DC thar Pu H. Lalengmawia IAS hovin Kolasib a Department hrang hrang hotulu te chuan meeting an nei a. He meeting ah hian Kolasib a High School leh a chunglam zirna ina hotulu te; SBI, Apex Bank leh MRB aiawhte leh ICAR aiawh te pawh an tel a ni.
Kolasib DC Pu H. Lalengmawia a chuan mahni hian engkim kan ti thei vek lova, Sawrkar hnathawh hi thawhhona teamwork a ni a, Department hrang hrang inkara thawhhona kan neih that a pawimawh a, District Administration hnuaia Department zawng zawngte hi Team khat anga in ngaia hna kan thawh a tul a, chu chuan nasa leh zawkin mipui rawngbawlna kawnga te, hmasawnna hna a kal chak danah te awmzia a nei thui thei a. Department hrang hranga hnathawh kalphung te kan inhriattawn phah thei a, inpuihtawnna kawngah pawh nasa leh zualin a in hawng thei a ni, a ti. Department hrang hrang hotulu te chu an harsatna tawh thin, an Department hotu te an hrilhin District Administration pawh hrilh hre ve thin turin a chah bawk.
DC chuan zirna hi kan ngaihpawimawh tlan vek a tul a, Kolasib District hian a tlangpuiin zirna lamah hma a sawn nia ahriat thusawiin mithiam puitling chherchhuahna kawnga tan lakna tur a la awm a ni, a ti a. Zirlai naupangte ngaihtuahna ram siam that a ngai a, an thinlunga hemi atan hian zirna mei alh phum a tul a, an theihna te hai lanna kawngah zirtirtu ten tan an lak a ngai hle a, zirlai bu bakah zir lai kaihhnawih lehkhabu tha te an chhiar leh an rawn a ngai, a ni, a ti a. Kolasib District-a ziak leh chhiar thiam lo la awm te, ziak leh chhiar thiam tirna kawnga Education Department chauhin hma a lak a tawk lova, hemi atan hian Department hrang hrang te pawhin ngaituahna leh tha an sen chuan Kolasib District ah literacy percentage a san ngei theih a beisei thu a sawi bawk.
Pu H Lalengmawia chuan ran khuahkhirhna lamah te, thianghlimna leh faina kawngah te khawtlang nen tan lak a ngaih thu te a sawi a. Sawrkar flagship programme NLUP chungchang sawiin Kolasib hian potential a nei sang a, chuvangin NLUP ah hian achievement sang ber ni tura Line Department hrang hrang te chu theihtawp chhuah turin a fuih a. A vilna(monitoring) chu ngaihpawimawh leh zual anih tur thu a sawi bawk.
DC chuan ramri chungchang chu a ngaihpawimawh berte zing ami anih thusawiin state thenawm te nen boruak ralmuang leh muanawm a awm chhunzawm zel theih nan theitawp a chhuah tur thu leh hmalak a tum thu a sawi a. Ramri a boruak tha a awm chhunzawm zel theih nan mawhphurhna kan nei tlang vek a ni tiin Department hrang hrang te chu hemi atan hian hmaraw tangkai ni turin a sawm a. Cachar DC leh Hailakandi DC te chu a hman hmasak berah lenchilh a tum thu a sawi bawk.
He meeting ah hian S.P Pu C. Lalzahngoa, Addl D.C Pu R. Lalremsanga leh SIRD Director Pi Maria CT Zuali te pawhin thu an sawi bawk a. Department hrang hranga Head of Office ten an hnathawh leh harsatnate an sawi, Zirna in hotulu te pawhin an zirna in dinhmun an tarlang tel bawk a ni.
He meeting zawh hnu hian Pu H. Lalengmawia chuan Railway, ONGC leh BRTF aiawh te chu a office chamber-ah a kawm a, an kutthlakna project theuha an thlen tawh chin leh harsatna an neih te a zawt bawk a ni.
