Vawiin khan DC Conference Hall Mamitah Pu Bhupesh Chaudhary, IAS, Mamit District Bawrhsap hovin NLUP Kutpui (Fair cum Exhibition) thlathar Ni 13 leh Ni 14-a neih dan tur line department hrang hrangte nen relin an thukhawm. 

NLUP Kutpui hi Bazar veng Indoor Stadium leh Market Shed bakah a chhehvela neih tura ruahman a ni a. NLUP Line Department hrang hrangte'n Stall buatsaihin an thil thar chhuah leh an kaihhnawih Department thil hrang hrangte lei theihin buatsaih a ni dawn a ni. Line Department leh NLUP Beneficiaries te'n an thil zawrhte hi zaa sawmhnih (20%) thleng discount a ni dawn a. He hun hi Mamit District mipuite'n ngaipawimawh a, an thil zawrhte leisak turin mipuite an sawm tak meuh a ni.

NLUP Kutpuiah hian Vety Department atangin Bawnghnute atanga siamchhuah thil hrang hrangte, Arsa leh Artui bakah Sial sa lei tur a awm anga, Fisheries Department lamin Sangha ei nghal mai theih leh Sangha tharlam tak tak an phochhuak ang. Agriculture lam atangin Fu tui, Oil Palm hriak leh Oil Palm atanga Sahbawn siam chhuah bakah Mizo buh leh Buhban  chi hrang hrangte lei theihin an phochhuak ang a, Industries Department atangin Mizo puan leh Tailoring Trade hnuaia puan thui thiamte'n an thawmhnaw thuite lei theiha an pholan dawn bakah Hair Cutting Trade hnuaiah lu mehna Stall siam a ni ang a, hetah hian man tlawm zawkin a duh apiangte'n lu an mehtir thei dawn bawk a ni. Horticulture Department pawhin an thil thar chhuah hrang hrang Balhla, Dragon Fruit, Tomato leh Hmarcha lei theih turin an phochhuak bawk ang. Sericulture Department pawhin Silk atanga siam chhuah chi hrang hrang an pholang anga, Forest Department lam pawhin Teak atanga furniture hrang hrang siam chhuahte bakah Mau atanga thil siam chhuah hrang hrangte an phochhuak anga, Soil Department lam atangin Hmunphiah leh Rubber tiakte lei theih turin an pho chhuak ang. Transport Department atangin NLUP hnuaia Autorickshaw dawngte'n NLUP Kutpuiah hian man tlawmin zawkin Passenger-te an phur dawn bawk a ni.

Heng bakah hian Mamita Bank pathumte'n mipuite tana hamthatna hrang hrang awm theite an tarlan dawn bakah Account hawng duhte tan a hmunah hian an hawnsak dawn bawk a ni.

NLUP kutpui pual hian thla thar Ni 13 zingkarah marathon race buatsaih a ni bawk ang.