Vawiin chawhnu dar 1:30 khan Aizawl DC Pu C.Thanchhuma hovin ama Office Chamber ah Food, Civil Supplies & Consumer Affairs Department hotute leh Aizawl District Police hotu leh I&PR department aiawhte an thukhawm a, Mizoram Oil dinhmun chungchanga hmalakna te an thlirlet. A pumpui thu-a hmalakna te a hlawhtling an ti a, FCS&CA staff te leh Police lam ten Pump te vila tha taka thupek an kenkawh theih avangin lawmawm an ti. Tukin zinga report dawn ang chuan Aizawl-a pump hrang hrangah M.S. - 119000 ltrs leh H.S.D. - 106500 ltrs a awm a, nimin khan Ramnagar atangin M.S. Trip 13 leh H.S.D. Trip 25 rawn thawn a ni bawk. Oil dinhmun chu ziaawm chho zel dawna a lan avangin vawiin atang hian Petrol/Diesel pawh Free Sale ni se tiin Meeting chuan a rel a, FCS&CA Director pawhin order hi chhuah nghal ni se an ti. Hetih rual hian Mizoram tana Oil lo thleng erawh pawnlama lak pen phal a ni lo a, tul bik thilah chuan Director, FCS&CA-in Special Permit a pe thei ang. Pump tinah Oil hralh chhuah hun tura lo bituk tawh - 4:30 a.m. atanga 10:00 p.m. chu la kenkawh chhunzawm zel a ni ang a, hawn chhung ai mah hian pump khar tawh hnu-ah Police lam pawh ngawrh zawkin duty ni se tih meeting chuan a rel bawk a ni.