Vawiin khan Mamit Bawrsap Pi Lalbiaksangi hovin D.C. Conference Hall ah Mamit District chhunga Telecommunication Provider te nen an inkawm.

Pi Lalbiaksangi chuan Mamit District chhungah inbiakpawhna a that loh avanga harsatna tam tak an tawh thin thu sawiin,a bikin BSNL chu kumtluan deuh thaw a hman mumal theih loh a a awm thu a sawi a. Lehkha hmanhmawh thlak te pawh Fax- line a chhiat reng avanga inthawn theih a nih loh thu leh BSNL Broadband hman theih loh chang a tam avanga,harsatna sutkian dan tur ngaihtuah ho tura meeting koh anih thu a sawi a.

U.N Das,Deputy General Manager, BSNL Mizoram SSA chuan harsatna sutkian anih theih nan tun thla chhung ngei a Battery back-up1500AH 2 set,Power Plant 100A(6+1) leh Mizo veng, Mamit a Tower an dah belh dawn tih thu kalkhawmte a hriattir a ni.

Tun dinhmunah Mamit District pumah BSNL Tower hmantheih pathum a awm mek a,Power back-up na tur a awm loh vangin inbiakpawhna ah harsatna District hian a tawk deuh reng a ni.

MJA,BSNL Consumer’s Union Mamit leh District Consumer’s Organization Mamit te’n BSNL hotute Mamit District enkawl turin J.T.O pakhat tal dah tur a ngenin an harsatna tawh te a rang lama sutkian dan ngaihtuah turin an ngen bawk. Meeting ah hian Mamit District Forum,BSNL Consumer’s Union,District Consumer’s Organization,MJA,Joint VC,Sub-Headquarters YMA, leh Sorkar official te an tel a,BSNL atangin Deputy General Manager leh J.T.O te an tel a ni.