‘YMA hi khawtlang nun siam thatna kawnga kan kutke ber an ni’ Chief Minister Pu Lal Thanhawla chuan a ti. He thu hi vawiina Chhim Veng Branch YMA Serchhip in kum 75 tlin lawmna, Platinum Jubilee celebration Modern Middle School, Serchhipa neiha a sawi a ni.

Chief Minister chuan YMA nen sorkar chu inkawp takin thawhhona tha tak an nei a ni a ti a. YMA memberte chu ram nghahfak an nih angin nghahfak tlaka awm turin a chah a. Ruihhlo a dona kawngah sorkar chuan a thlawp tlat a, ruihhlo ngaite chhawmdawlna an pe thin chu thil lawmawm tak a ni a ti. Chhim Veng Branch YMA Serchhip chu a sulsutute hre reng a, an thwhrimna leh inpekna avanga tun hi thleng an ni tih hre thar turin a chah a ni.

Chief Minister chuan eng hna pawh thawk ila, kan awmna theuh hi Pathianin a rawngbawl tura min dahna a ni a, chuvangin rinawmna, dikna, taimakna leh Amah tihna nung nen kan thawk tur a ni a ti a. Dikna leh takna nun kan neih angai tiin, lemchanna nun a dingchhuak ngailo a ni a ti a. Ringtu kan nihna hi rim taka hmangin, mi te tana malsawmna ni tura inkaihruai turin YMA memberte chu a chah a ni. Hmasawn tur leh Pathian malsawmna dawng thei turin A lama kan tan hmasak angai a, kan lama a tan chuan malsawmna tam zawk min pe thei a ni a ti. NLUP pawh A lam tang program anih avangin chawimawiin a awm mek a ni a ti.

Pu Hawla chuan Mizote ang em ema zu buaipui hi khawvelah hnamdang an awm a hriat loh thu sawiin, a in ngailo te hlei hlei hian an buaipui emaw tih tur a ni a; Mizo hnam hi zu buaipuilo hnamah siam kan duh a ni a ti.

Chhim Veng Branch YMA Serchhip hi kum 1940 December ni 8 khan Bawngchawm khuaah YLA tiin din a ni a, kum 1967 atang khan tuna anihna hi a pu ta a ni. A branch huamchhungah hian member 498 awmin, mipa 324 leh hmeichhia 174 an awm mek a. Chenna in 174 leh chhungkua 217 leh mihring cheng zawng zawng 1079 an awm mek bawk. Platinum jubilee lawmna hi kumin 2015 September ni 25 atanga lawm tanin, ni 75 chhung an lawm a, intihhlimna leh inelna hrang hrangten a lawmna an hmang a ni.

Lawmna inkhawm hi Pu C.Lalhminghlua, Organising Chairman in a kaihruai a ni.