No.2377/2020-2020

Mamit 24th June, 2020 : Vawiin khan DC Conference Hall, Mamit-ah Dr. Lalrozama, IAS, District Bawrhsap chuan Pradhan Mantri Awas Yojana (PMAY) Housing for All (Urban) hnuaia Beneficiary Led Construction (BLC) 1st Instalment chu mi 106 hnenah a thawhkhatna atan a sem.

District Bawrhsap Dr. Lalrozama chuan he Scheme-in a tum khawpui chhunga in la nei lo te tan a nihna ang taka hmang tur leh a hmanna tur taka hman a tul thu a sawi a. Department leh Khawtlang hruaitute pawhin he PMAY Housing for All dawngtute chuan a nihna ang takin an hmang em tih lo vil zui turin a chah bawk a ni.

Pu Hmingthianghlima, Civil Engineer, UD&PA Department, Mamit chuan Report pein tuna in sak tanpuina Estimate Amount hi cheng Nuai 2 a ni a. Chuta tang chuan 25% (Rs.50,000) hi Beneficiary Contribution tur niin cheng Nuai 1 leh Singnga chu Sawrkar lam atanga pek tur a ni ang. Heng sumte hi Instalment 3 (thum) a kalpui tur a ni ang.

BLC-ah hian 1st Instalment dawng tur Mamit-ah Beneficiary 528 leh Zawlnuam-ah Beneficiary 239 tan Fund hi dawn a ni a. Tun tumah hian Beneficiary 106 hnenah sem niin a dang zawng hi a tahtawla sem leh tur a ni. Insak chhung hian Department in geo-tagging (GPS hmanga ram emaw in sak thlalak) vawi nga (5) tih tur a nih avangin a hun taka tih a nih theih nan in satu in thawktute hnenah Report a pe zung zung tur a ni.

Vawiin Launching Programme hi Pu C. Sawihlira, DUDO, UD&PA Department Mamit-in a kaihhruai a. Tunlai hrileng mek avangin Beneficiary zawng zawng inkohkhawm theih a nih lova, chuvanga mi tlemte chauh kalkhawm thei an nih thu a sawi. Geo-tagging tih a ngaih dawn avangin Beneficiary tin te chuan an In sakna hmun tur chiang deuha thlang fel turin leh an vawikhat thlan fel tawh chu insawn leh a theih tawh dawn loh avangin uluk leh felfai taka ruahmanna siam turin a chah a ni.

He hunah hian Mamit khawpui chhunga VCP-te leh Beneficiary-te an tel a ni.