No.2376/2020-2020

Vawiin chawhma khan Power & Electricity Minister Pu R.Lalzirliana'n District Hospital Saitual a hmantur 10KV Generator pe in, generator chahbi hlanna a nei.

Minister hi Saitual DC Pu V.L Hruaizela Khiangte, Saitual SP Pu P.C Lalduhthlanga, MO Dr. Vanzarliani ten an lo dawngsawng a.

10KV Generator hlanna hun tawi hi social distancing vawng chungin mi tlemte in District Hospital, Saitual kawtah hman a ni a. Nurse Superintendent Pi Sailotluangi Sailo in Bible chhiarin tawngtaina hun a hmang a ni.

Minister Pu R. Lalzirliana'n thu sawiin COVID-19 hripui len laia District Hospital-a hmantur 10KV Generator hlanna hun lo buatsaihtute hnenah lawmthu a sawi a. Kum upa lam tan chhuah tamloh a tha tih sawrkar in thuchhuah a siam chu ngai pawimawhin a Bial pawh duh anga a tlawh zin theihloh naah thupha a chawi a ni.

Minister chuan COVID-19 dona kawnga thahnemngai taka thawktute chu chawimawi phu an ni, a ti a. Ram hruaitute- Chief Minister, Home Minister, Health Minister leh midangte pawh finchhuah zel turin Saitual mipuite a sawm a ni. Minister Pu R.Lalzirliana chuan Supply Minister in COVID-19 hripui len laia buhfai monsoon stock a chhekkhawl chu mipui tan a vanneihthlakin a thlamuan thlak a ni, tiin a sawi.

District Hospital, Saitual-ah hian COVID-19 hripui leng avanga a tul apiang thawktura inpe - nurse, laboratory technician, driver etc mi 40 bawr vel an awm mek a. Minister hian a tul apianga an hman tur Rs 50000/- a pek bakah COVID-19 hripui leng avanga chhun leh zan pawh sawiloa Police duty thin ten a tul anga an hman tur Rs 50000/- a pe nghal bawk a ni.

Minister hian Mizoram Teachers Federation ten Ambulance an pek khalh tur Driver pakhat hlawh kum khat atan MLA fund atangin a pe nghal bawk a ni.

District Hospital, Saitual-ah hian MBBS 4, BDS 1, AYUSH Doctor 2 an thawk mek bakah COVID-19 hrileng avanga a tul anga thawktur MBBS zirlai volunteer 2 an awm mek a ni.