No.2375/2020-2020

Tukin khan Environment Forest & Climate Change Minister Pu TJ Lalnuntluanga, Champhai South bialtu MLA chuan Champhai Vengthar leh Zote inkar inkalpawhna kawng siam tur chu tlawhin, kawng awmsa tihzau leh cheihnum dan tur chu district Official leh khawtlang hruaitute nen an enho a ni.

Forest Minister Pu TJ Lalnuntluanga chuan hmasawnna ruhrel siam leh hnathawhna tura sawrkar sum lokalte anihna ang taka hman anih theihna tura tanrual angaih thu a sawi a. Official leh khawtlang hruaitute chu ngaihtuahna fim leh thianghlim tak senga ram leh khawtlang tan eng thil tha nge ka thawh ang tih ngaihtuaha insawrbing thin turin a chah a. Khawvel changkang zel leh khawpui than dante thlirin Champhai Master Plan siama chak taka hma lak chhoh mek zel anih thu pawh sawiin, Champhai khawpui tawt lutuk tihziaawm leh inkalpawhtawnna kawngpui tha zawk awm theihna turin Ring Road siama hmalak tan tawh a ni a, Zotlang leh Tlangsam inkar kawng lian leh tha zawka siam mek ani a, Tlangsam leh Zote inkar thawhna tur sum pawh ruahman tawh niin, a tahtawlin a dangte pawh ngaihtuah zel tur ani ang, a ti.

Pu TJ Lalnuntluanga chuan Covid-19 avangin duh anga hmasawnna hnathawh kawnga hmalak a harsat rih thu sawiin, kawng siam tur chu nakin zel ngaihtuaha Champhai leh a chhehvel khuate tana chhawrnahawm tak tur anih avangin hna lo thawh lailawk nan MLA fund atanga cheng nuai 5 a pek dawn thu sawiiin, PWD in zirchianna an neiha hnathawhna turte hmuh anih hnuah line department-te nena tang tlangin kawngpui tha tak sial tum anih thu a sawi a ni.

Champhai Vengthar leh Zote inkar kawng Kilometre 1.6 a thui hi metre 9 vel thlenga tih zauh tum niin a theih anga cheithat tum a ni a. He kawng hi Champhai leh a chhehvel Hnahlan tlangdung khua ten awlsam leh hnai zawka Champhai khawpui an luh leh chuah theihna kawng tangkai tak a ni. PWD Champhai Division in chiang zawkin zirchianna an nei ang a, DPR te siamin a tul anga hmalak chhunzawm tum ani.

Tukin Champhai Venngthar-Zote Road siam tum endikna hunah hian Minister hi Pi Maria C.T Zuali Bawrhsap, Pu Rex Zarzoliana Vanchhawng SP, Pu Mark Lalthanliana Addl DC & PD, DRDA, Pu Lalduhthlana DFO, Dr Lallawmkima DIPRO, Pu Eddie C. Zothansanga, EE, PWD, Pu Thangchhuana Pautu SDO PWD, Pu H.Zahmingliana AE, DRDA, Official dangte leh khawtlang hruaituten an tawiawm a ni.