No.2374/2020-2020

Nimin khan Lunglei HPC Vice Chairman Pu Lawmawma Tochhawng chuan Zobawk, Lungleia Fisheries Department leh LAD Department-te hmalakna a hmunah kalin a enfiah.

Fisheries Department hnuaia sangha chi siam chhuahna hmun Fish Seed Farm, Zobawk ah hian sangha tih keuna ‘Chinese Circular Hatchery’ chu cheng nuai 4.50 senga siam that mek niin Lunglei DFDO Pu Zohmingthanga chuan he hna hi tun kar chhunga zawh ngei an beisei thu report-in sangha note thar chhuak thuai thei turin hmalakna chak taka a kal mek thu a sawi. Tin, HPC kaltlangin helai hmun hi tih changtlun zel tum niin fencing leh sangha dil tih zau kawngah pawh hmalakna a kal mek a. Tin, Lunglei leh Tlabung inkara awm Phairuangkai khaw dai ah pawh sangha dil lian tham tak HPC kaltlangin Fisheries Department hian an chei chho mek a ni a.

Lunglei HPC Vice Chairman Pu Lawmawma Tochhawng chuan HPC-in a tum pawimawh ber chu ei leh bara kawnga kan intodelha, phai lam atanga kan thil lakluh hnem lutuk tih hniam a ni tiin Fisheries Department hnathawh mek te chu hemi kawnga hmalakna pawimawh tak a ni, a ti.

Nimin vek khan Lunglei HPC Vice Chairman hian District Park, Zobawk tlawhin helai hmun chei that dan tur Department thawktute a hmunah en puiin ruahmanna a siampui a. Swimming pool awm sa siam that a nih dawn bakah fountain, naupang infiamna hmun, outdoor shooting range-te siam tum a ni. Heng ruahmannate hi a theih anga lo thawk tan nghal tur leh harsatna an neihte a hnena thlen vat thin turin HPC Vice Chairman chuan a chah a ni.