No.1402/2021-2022

Kolasib dated 15th July 2021: Vawiin chawhma dar 11:00 khan Sub Headquarters YMA Kolasib huaihawtin kum 2021 HSLC leh HSSLC exam a Kolasib District a zirlai tithate chawimawina hun Diakkawn Branch YMA Committee Room-ah hman a ni a. He hun ah Kolasib Bawrhsap Dr. H. Lalthlangliana, Chairman, District Education Committee ni bawk chu khuallian niin, District Education Officer Pu Lalramthianghlima leh Kolasib Sub Headquaters YMA hruaitute an tel bawk a ni.

Dr. H. Lalthlangliana chuan zirlai tithate lawmpuina thu sawiin, ‘Taimakna leh Nungchang tha leh dikna nunpui’ chu hlawhtlinna kawng a thil pawimawh tak a ni thu sawiin, an kalzelna turah duhsakna a hlan a. Pu Lalramthianghlima, DEO Kolasib chuan zirlaite hnenah tunlai changkanna chu an zirlai tibuaitu ni lova an zirlai puitu atana hmang thiam turin a chah a. Zirlaite Result tha tak nei thei tura zirtirtute leh an nu leh pate inpekna chu fakawm a tih thu a sawi bawk.

Vawiin zirlai zirna a titha zual chawimawina hun hi Pu C.Lalmuanpuia, Vice Chairman, Kumpuan Sub Committee-in kaihruaiin Pu Thomas D.Lalengliana, President, Sub Headquarters YMA chuan ‘Zirna chu hlawhtlinna chahbi’ tih thupui hmangin zirlaite fuihna thu a sawi a, rilru nget tak nei a mahni tuina zawn theuh a kal turin a chah a. YMA chuan zirna hi ram leh hnam hmasawn nan a chawisan zel tur thu a sawi bawk a ni.

Vawiin a zirlai chawimawite chu:
1. Lalrinmawia s/o Lalruatkima
Bualpui, Hmarveng
HSLC 6th Rank (Distinction, Letter in Mz, Eng, Maths, Sc & SS)
2. Jonathan Remsangzuala s/o Lalzarliana
Hmarveng, Kolasib
HSSLC 7th Rank (Topper – Political Science)
3. Laldinpuii d/o Lalrinliana
Bairabi North, Rimawi Veng
HSSLC (Topper – Mizo)
4. Zothansanga s/o Remlalmuana
Hortoki Vengchhak
HSSLC 9th Rank (Distinction, letter in Mz, Eng, Edu, Pol. Sc & History)
5. C. Zodinpuii d/o David Zolianmawia
Project Veng, Kolasib
HSSLC (Topper – Biology)
6. Vanlalbiakdiki d/o Zohmingthanga
Hmarveng, Kolasib
HSSLC 6th Rank

te bakah H.K. Lalrinawmi d/o Lalpiangliani, (CWSN-Children with Special Needs) ri hriatna lama harsatna nei chunga HSLC Exam a Distinction (Letter in Mz, Eng, Sc & SS) ni theite an ni.

Kum 2019 atanga 2021 thleng hian YMA kumpuan thupui atan ‘Zirna Uar’ tih hman a ni a, hei hian zirna kawnga zirlaite zirna tithuanawp thei ruihhlo do a keng tel bawk. Kumpuan thupui denchhan hian YMA Branch hrang hrangte’n zirna kawnga mizo mipuite hmasawnna kawng an ngaihtuah thin a ni.

Vawiin pawh hian Sub Headquarter YMA Kolasibte chuan zirna kawnga hlawhtlingte leh titha zualte chu midangte entawn tur a pho lan an nih theih nan Citation leh cheng 1000 theuh an buatsaih a. Dr. H. Lalthlangliana DC, Kolasib leh Pu Lalramthianghlima, DEO, Kolasib chuan heng lawmpuinate hi zirlaite hnenah hian an hlan a ni.